☆MIN EN LA☆ - 24 By Dingdi Pachuau

 ☆MIN EN LA☆ - 24 By Dingdi Pachuau

Ka rin aia hmain Mamite chu an rawn thleng a! Eirawng ka bàwl laiin an rawn thleng bawk a, pu ber quarter gate-ah chuan an rawn tlãn lút a, Adonis-a'n car a rawn keng a lo ni, Pu ber garage-ah a dah lût ve zân a, Mami'n min han hmuh chuan," Awi, tikhân nu ber chan han chang ta mai la, Jaliana pawh a ngaihtuahawm loh sawt dâwn asin," tiin min rawn fiam nghâl bawrh bawrh rêng a, fiamthu mah ni se ka hmai a sa hat hat thei tho mai. Kan inkâr hi chu a la hre hauh lo ang a, keiin ka la hrilh lo va, a unaupa hi chuan a hrilh hauh lo ang, vawiina thil thlengte kha hre ve ta se engtin nge a ngaih ang le...!?

Adonis-a chu a takah a lo sângin a vun pawh a ngo zâwk, a chér deuh bawk a, pu ber chu a chen lo thung ang, Mami hi chêr lam deuh leh hmêl young lam hian a hîp deuh a nih ber hi. Adonis-a pawh hi hmêl sexy leh pà deuh hlek ang chi kha a ni lo va, naupang pawisawi lo deuh ang hi ka tehkhin deuh ber, țawng paha Mami chu enin a nui leh sen sen țhìn roh a, a sual loh hmèl khawpin ka hria.

Pu ber lo haw hma chuan kan in lamah kan inzui phei a, Mami chawhmeh rawn lei pheite chu kan han dah fel sawk sawk a, Zotei pawh a lo inrêl peih vek tawh a, Adonis-a chu a bàwl kêp tho a lo ni, chaw ei ve nghâl mai tùra ka tih chuan," A làwmawm viau nain ka rawn zin ve chhuna U J-a ei chhuahsan daih chu, a mal àwm êm mai, a rawn thleng țêp tawh bawk a, ka ei ve rih lo mai ang e," a ti tlat a, Mami chuan," Nia, hun a la tam alawm, va haw phei nghe nghe tawh rawh," tiin Adonis-a chu a han hnaih sauh a," Mahse, lo khulh zo vek lo ula aw, kan duh ve ang," a ti zui sar sar a.

Ka inbual phawt a, chumi hnuah chuan chaw chu kan ei a. Mami chu chaw ei pah chuan a titi siam siam a, khua a tihar lo khawp mai. Zanriah ei kham hnu deuhah Adonis-a rawn kalin," In rawn phei dâwn lo em ni?" a rawn ti a, Mami chuan," Phei ang chu, i va hmanhmawh tak! Chaw in ei kham ve chauh a ni lo'm ni?" a lo ti thung a, ani chuan," Nih chu ni tho e; mahse, mipa pathum chauha awm chu a zahthlâk lek lek a," a lo ti leh mai a.

"Min ngai leh hman tawh chiang?" nui chunga Mami'n a tih chuan," Ka rilru hre thei viau zël suh," a lo ti ve mai a, chutah," Hawh u, phei tawh ang u, in hman tawh tho chuan," a ti leh zat a.

"Kei chu ka lo phei ve lo ang, zàn lamah tal hi chuan Zotei hi ka'n awmpui ve ang e, a lehkha zir enpui pahin, bâkah, inah hian ka awm tlêm lutuk a maw," tiin chhuanlam ka han siam a, chhuanlam ni tho mah se thu dik tak a ni. Anni pawh chuan min ti lui bîk lo, an chhuah hnu chuan zai rât rât pahin thuamhnaw sûk tùr awm hlek chu ka han su rih a. Ka insu zo chiah tihah Nunhlima lo lêng tùr a rawn lût ve nghâl chiah bawk.

Mami chu rin aiin a rawn haw har lo va, Nunhlima pawh a la haw lo nghe nghe, an han titi dùn leh luam a; mahse, Nunhlima pawh a țhu rei ta bîk lo, a haw hnuah chuan," Chhuanlamte kha i'n siam vêl a, lo lèn a tum vàng a lo nih chiah kha. In lo la inzui reng a, a duh ve viau che a ni ngei ang, fel pawh a fel ve reuh khawp kha,"a han ti zui a, ka nuih ringawt, sawi chiam ka peih lo.

Khum a têt deuh avàngin chhuatah mutna kan phah a, tah chuan kan mu dun a. A unaupa quarter-ah nuam taka mut theihnaa awm laia ka bul chhuata mut a han duh zâwk tlat mai hi chu a mak ve a ni, min ngaih vàng han ti ila a dik chiah lo ang, min ngaih pawimawh vàng ti ila a dik zâwk ang.

"Kan phei dâwn khán zanin chu i rawn kal ve si lo va, kan inhlêp bîk àwm mang e ka ti rilru deuh a nia; mahse, Makimi kha inah a lo awm ve reng tawh a, kan inkim ta chiah a, mal bîk awm lovin," tiin a han nui hak hak a, chutah," Grapewine kha in ve chhin la ka tia, in zawh kha an han duh viau a nia; mahse, ka rem ti lo a, tlêm chu ka'n dahsak hlek che kha, tui i ti ve ngawt ang, ka pateate khaw lam um thar a nia," a ti sar sar a.

Makimi chu a lo awm leh hman tawh a nih chu! 

"En teh, Makimi hi a lo lêng zing ang tiraw? In inhmuh deuh chhên ka ring tlat, J-a nèn pawh hian an inhre chiang ve viau tawhin ka ring a, a țawng duh reuhin a hawihhâwm bawk sia, ka duhpui tlat alawm, an inhmeh dùn bawk sia," a ti leh malh malh a, kei pawh chuan," Nia, inhmeh khawp mai," ti chauhin ka lo chhâng ve a.

"Mahse, unaua hian a ngaihsak tâwk thiam loh hmêl ka ti, a hmeichhia lah hian a duh ve hmël bawk si a, hei ai hian tlêm tal pawhin a ngaihsakna hi tilang ve se, kan hmuhah leh hriatah a lo tilang duh lêm lo pawh chu a lo ni maithei tho bawk a; mahse, zanin erawh kha chuan innghèng rialin an țhu ve a nih kha, J-a rilru hi a hneh thiam riau a nih ka ring," a ti leh sar sar a, sawi nuam a ti bawk si, a thil sawi chuan min tina deuh zawk zawk a ni tih lah chu a hre dèr si lo.

Ka mutna ka sawn vàng nge, ka muhil thei lawk lo va, thil tam tak ka ngaihtuah kual a. Thil țúl lo leh awmze nei lo a ni tih pawh ka hre reng tho; mahse, muthilh theih bawk si loh chuan ngaihtuah a awl ve êm bawk a ni. Mami chu a thaw sâk sâk a, a mut tui hmèl khawp mai a, ka awt ru angreng khawp mai.

Adonis-a chu Lungleiah a la rawn kal ngai lo va, chu vàng chuan Mami chuan a lèn chhuahpui a, min han sâwm ve tak nain hna ka nei si a, ka chhuak ve lo. Zànah erawh Mami chuan," Naktûk chu J-a'n i chhuah ve a phal aw, kan dìlsak diam che a. Het, min lo hnial lo teh, i tâna nuam lo tùr a awm lo, kan sawi a, a phal a, lêng chhuak tùrin inring la a ni mai," a ti hmak hmak a, kei chuan," Chuti ringawt tùr a ni lo, in tih fel ringawt a ni lo va, tlai lama a ei tùr pawh siam--" ka la tih lai mêk chuan," A ngai lo, kan ei chhuak vek dâwn alawm, bàwl buai a ngai lo," a lo ti leh mai a.

A tûk zîngah erawh tûkțhuan tùr ka bâwl leh phawt a, ka bàwl laiin chokaah chuan rawn lútin," Vawiin chu i lêng chhuak dâwn bawk a, hlim taka hun hman i tum a ni ang chu," a rawn ti sup a, kei erawh chuan ka chhâng hran lo, phùr erawh ka phúr ru khawp mai, ka chhuak khât ve si a, hna thawk tùr ni lova len chhuah mai mai chu a châkawm ve êm asin.

Sum lamah an ngaihtuahawm dùn lêm lo bawk a, ei leh in mai mai tùr pawh chu an lei sa țeuh mai, ka lo inrawlh ve chu a ngai hauh lo. Lungleiah hian lènkhawthawnna tùr a vâng a, nimin lamah an lo tlãn kual tawh bawk nèn, khawpui chhûng chu tlàn chhuahsanin Theiriat tlângah kan han kal a,  cameraman-ah te ka han țang zak zak mai. Inngaizâwng ni mah se min ngaihtuah ve a ni ang ka ti mai, pathum chauh kan ni bawk a, an intihrang chuang lo, malin min dah lo tihna a nih chu.

Kan haw lam kawnga kan tlàn lai chuan Adonis-a chu Jakob-a chuan a rawn bia a ni ngei ang," Aw le, hei kan lo haw mêk a, kan rawn thleng hman lutuk ang, lo awm reng la," a ti a, an inbiak zawha Mami'n eng thil nge a rawn sawi tih a zawh chuan," U J-a'n a Office tlawh ve turin min rawn sâwm a nih kha, officer office chu hmuh ve pawh a châkawm alawm," tiin a lo chhâng a. Ka châk viau nain ka zak deuh thung, a hna thawhna hmuna a awm dàn leh a hnuaia thawkte a biak dànte erawh hriat a châkawm ka ti.

A office chu chhãwng chung lamah a lo awm niin, step-ah chuan kan chho a, a room luh dâwn chuan a hming leh a nihna inziak chu a kawngka lu chung chiahah chuan a lo intâr vàng a, ka zah thar deuh thut mai. A thil sawi ka chhâng lêt nasa theiin a châng phei chuan awka hriat nuam vak lovin ka chhâng zauh zauh țhìn nghe nghe a nih kha, a rûk tak chuan mak min ti ngawt ang!

Kan han luh lai chuan mi pakhat nèn hian inhmachhawnin an lo ţhu dùn a, thil pawimawh an sawi a ni ngei ang, min lo hmuh chuan," Lo țhu lawk r'u aw," a rawn ti zauh a, kan țhutna tùr lam min hrilhin a lu chu a bu pah zauh bawk a, chumi hnu chuan a inlêngpa bawk chu a ngaihven zui leh ta a. A hmël chu a thutak ràn a, thu a neih hmèl bawk si a, a kamis dum nawh dak thlarh chu a inhmehin, a țhut dàn, a bula țhu a ngaihven dàn zawng zawng nèn chuan a hmuhnawm ka ti, a hmel pawh a țha zual sauhin ka hria.

"Hmuhnawm àwm vung vung ve a..!!" Mami'n a rawn tih chuan ka phu deuh zawk a, hawi sawnin ka nui deuh ringawt a, amah vêk chuan," Kan bula a awma a nèlawm loh tehlul nèn, a office meuha dàwrtute chu a lo chhàwn ţhain a ngaihven bîk kher mai, a nuihzatthlâk e tiraw? Tihian, mi hian thil pawimawhah an rawn hmu ve țhìn chu a ni àwm si a," tiin zàwi tê hian a nui zui kar kar a, kei pawh chu chu ka ngaih dàn ve tho a ni; mahse, a hna thawhna hmun a ni a, chutia a awm chu a ngai ve miau si a.

A inlëngpa chhuah hnu chuan eng emaw hi a ziak zung zung a, a dah fel hnu chuan bell hmetin pa pakhat hi a rawn lût a, chu pa hnênah chuan lehkha chu pein eng emaw hi a hrilh pah a, chu pa chu a chhuak zui ta nghâl a. Rei lo te hnuah nula pakhat hian thingpui no li leh hmeh tùr chhang a rawn chawi lút bawk a.

"Ka office meuha rawn lêng ta chu ei in lova in chhuah leh mai ka duh lo va," a ti sup a, Adonis-a chuan," I office chu a nuam khawp mai, officer lian office nge nge, kan puar dâwn bawk si," tiin a nui sâng a, Mami pawh chuan," Officer unau neih man  a awm dâwn e," a lo ti ve a, kei erawh chu ka ngawi reng thung.

Bathlàrahte chuan kan chhuak a, hawi vël pawh a nuamin a office awmna lai chu a nuam berin ka ring, a thawvengin a zau nuam bawk si. Ka dah vang vang lai chuan Polite-i khân a tlawh ve tawh ang em tih ka ngaihtuah chhuak thut a, a tlawh tawh ngei ka ring zâwk, ring tak ka ni.

Kan awm chhúng chuan vawi khat mah a mitah ka en lo, a lam hawia ka țhut pawhin a hmêl ka en lo hrim hrim, min lo en lét ve ka hlau a ni. Ka awm dàn ațangin Mami chuan min hriat thiam loh hrãm beisei ang, a zahthlâk dâwn lutuk si a.

Naktûk chawhnu lama an haw phei leh mai tawh dâwn avàngin zanriah chu hotel-a ei chhuah an lo sawi lâwk vek tawh a lo ni a, Zotei leh Jivan-a pawh an lo sawi tel a; mahse, kei chuan," A ngai hauh lo, Zotei chuan duh pawh a duh chuang lo ang, kei pawh min telh s'u," ka ti a, Mami chuan," I tel loh chuan tu mah kan kal bîk lo ang, kan sawi lâwk vek tawh a, vawi khat chaw ei chhuah kha a ni mai, Zotei'n a lo duh ve kher loh pawhin nang chuan i duh ngei a ngai, bâkah, kan rawn zin phei ve êm êm a, hetiang a nih dâwn chuan kan rawn zin tawh hauh lo ang, tiraw?" tiin a bula țhu Adonis-a chu a han en a. Ani chuan," A ti ve mai mai, kan kal vek dáwn alawm, chumi hnuah kan party bawk ang a," nui chung hian a lo ti a.

Zotei chuan a duh lo ta ngei rêng a, an tilui lêm lo bawk. Jivan-a pawhin lo hnialin," Kei pawh inah ka lo ei thei alawm, țhalai zînga che chhuak ve chi pawh ka nih loh hi, hlim deuhin hun hmang rawh u," a lo ti ve a, ani pawh an tilui duh lêm lo.

Lunglei hi ka la bel lêm lo a, Pathiannia inkhâwma ka chhuah bâk hi chu ka chhuak khât bawk a, a àwm ve tho. Tuna zanriah kan eina tùr pawh hi ka vawi khat kalna a ni a, hetiang hmun nuam leh changkãng hi a lo awm reng a ni tih pawh ka lo hre hauh lo. An ei siam lah chu a tuiin a thianghlim bawk si a, ka ei țeuh mai.

"Rengpuii ei siam chu a la tluk lo deuh a nih hi," Jakob-a chuan a rawn ti chhuak sup a, Adonis-a pawh chuan," Chutiang chuan i lo ngaihtuah ve elo?! Ka lo ngaihtuah chhuak ve chiah a," a lo ti ve vat a, kei erawh chuan," A âwihawm loh êm mai, an siam tui ka tiin ka lei ka lem lo chauh a ni," ka lo ti ve thung a.

"Ei siam a thiam viau vàng chu a ni ngei ang, tûn thlenga i hnêna a la thawh theih ni, a bàn leh thuai kha ka lo ring ru ve deuh a nia," Mami'n a lo tih chuan," A bàn hi phal a ni lo," Jakob-a chuan a lo ti sup a. Mami chu a lo nui hak a," I hnêna thawh hrehawm an tih theihzia kha, kum chanve thawk kha thawk rei ber a ni hial lo maw? Ngawi teh, thla riat thawk a awm leh tak si, an ţap pùr lo chauh zël chu a nih kha," a ti leh zat a.

"Ei an siam thiam lo hlawm êm alawm."

Ei ka siam thiam a tih vàng chiahin min la bàn lo chu a nih dâwn chu, ka bàn a phal lo bawk, ei siam thiam min tih vàng chauhin. Chutiang ngaihtuah chuan inthiarna lam chu ka pan a, ka hnungah a rawn kal ve nghâl a niang chu ka ti mai, ka lût tùr chu ka bánah min rawn pawt a, ka au țhat lo chauh a ni. A ti mak thei, mi an awm leh awm loh pawh a hre tawp si lo va, miin min hmu hlauh ta se mak min ti ngawt ang chu!

"Min thlah teh." Ka țawng ring ngam bîk lo, mipa inthiarna leh hmeichhe inthiarna hi inep chiahah a awm a, hmeichhia vei lamah a nih laiin mipa chu ding lamah a awm thung.

"Zanin zet chu i chhe lo tak zet!"

Bang nghèng chuan min nawr bet a, ka taksa thláwp zatin min rawn nghèng bawk, inthiar tùr rawn kal ta se min rawn hmu awlsam viau maithei a ni, ani lah hian engah vak a ngaih hmèl si loh, kan mualpho vaih chuan...

"Hetia tih hi i cho riau, ka thâ lah a za zek zek bawk a," tiin a rawn kûn hniam a, ka nghâwngah a rawn fâwp a, tãl chiam dâwn ila thãwm kan chhuah ka hlau si, ka thin chu a phu dup dup mai a, kan awm dàn vàng chu ni pakhat mah se, mi an rawn kal ang a, min hmu ang tih ka hlau bawk a ni, ka rilru a nuam thei lo.

"Min thlah teh, khawngaihin."

"Hlauthãwng suh, mi an rawn kal lo ang." A awa inrintâwkna lo lang chuan ka awm erawh a tinuam chuang hauh lo.

"Rei min lo ti tawh ang," ka ti leh ringawt a, ani lah chuan," Anni pahnih khân anmahni bâk an inngaihtuah lo, min hrechang teuh lo mai," a lo ti thung a, min thlah duh chuang dèr lo.

"Hetiang hian awm--" ka țawng lai chu ka hmui a rawn chhilh hmak avàng chuan ka chhunzawm thei lo, uar zetin min rawn fâwp nghâl tàwn tâwn a, min fawhna chuan ka thluak a tibuai nghâl vek maiin ka hria. Chhàn lét loh lam pawh ka ngaihtuah hman lo, ka thinlung chuan chhâng lêt tùrin min rawn tur ut ut ni berin ka hria a, ka chhâng lêt nghâl rêng bawk.

"Rengpui, ka mamawh che!"

Ni e, ka taksa hi a duh a, mamawh niin a inhria. Ani hi chuan thil sawi hreh a nei ve lo va, tunah pawh min mamawh thu a sawi leh hmiah mai, ni e, a hnêna ka thawh loh hi a duh lo, min kaltîr duh lo, ka ei siam tui a tih vàngin, amah pawhin a zêp lo bawk.

Chu lai hmun ațanga ka kal sawn dâwn chuan ka sam chu ka han chûl mâm thuak thuak a, chutiangin ka thuamhnaw pawh, ka lang pawr ang tih ka hlau tak zet, ka thâ lah chu a la khùr deuh der der zui a, min lo chîk viau phei chuan min hre chhuak ngei ang chu! Ka kal hmasa phawt a, chair-a ka țhut fel hnuah Jakob-a chu a rawn kal ve chiah bawk, kan fing ve lutuk chu ka nuih a za lek lek a ni.

He pa hi ka hnar thei ngai si lo, a buaithlâk, ka mualpho hma ngei hian ka inthiar fihlìmsan mai a ngai tak zet tawh a ni. Chuti lo zawng, bialnu a nei tih hre reng chung hian mualpho takin kan awm mai ang, a hna lamah hming chhiatna a nei ang a, kei lah kawp lai a nei  tih hre reng chungin... miin min dem lutuk palh ang. Kei pawh ka inthiam thei lo ang, mihring mithmuhah ka mualpho kher lo a nih pawhin Pathian, a rûka min hmu rengtu pawi ka sawi dâwn.

Chumi zàn phei chuan rei tak ka meng a, ka muhìl mang lo.  Ka hma lam hun tùr ka ngaihtuah a, ka tih tùr ka ngaihtuah bawk a, tih tùr ruahmanna ka siam a, duh lovin ka țhiat leh a, a dang ka ruahman leh a, chutiang chuan ruahmanna tam tak ka siam a, a tàwpah erawh chuan a rang lama ka nu biak leh phawt țha tiin zîng dár 4 rîk hma hretin ka muhìl ve hrãm.

Ka awm dàn hi a dik lo. Biak inah inkhâwmin inkhâwm ngaipawimawh viau mah ila ka awm dàn leh nungchang hian chu chu a hlatsan viau si, pu ber bulah chuan nula sihhnip ber angin ka awm leh zêl a, lo hnial tùr leh thil țha a ni lo ti tùr ka nih tehlul nèn, ka ti thei si lo, hetia ka awlsam ëm êm mai hi țawngțai lama ka inthlahdah vàng a ni ngei ang, kan inah leh Singapore-ahte kha chuan ka țawngțai ve nasa țhìn a nih kha, Jakob-a bula ka awm ațang hian ka țawngțai tlêm ta viau tih ka ngaihtuah chhuak a, thlèmna ka inhnehtîr teuhzia ka han ngaihtuah lét phei chuan zahthlâk ka ti, ka nuin hre ve ta ngat phei se chuan mak min tih dàn tùrzia mai chu, a rilru pawh a na ngei ang.

Ka nu chu biain a rang thei ang bera Mama chu Lungleia lo phei tùrin ka chah a, Mama'n tlereuh dàwr chu nghâkin in luah tùra ka en tawh kha luah bawk se, kei chu kan khuaah awmin hna ka thawk ve thung tawh ang, hei hi ka ruahmanna chu a ni. Ani nèn hian inhmu tawh lo ila a ţha ber, ka huang lo tùr ka dai a, dai lo tùr chuan amah hlatsana ka awm hi a ngai a ni.

Ka nu chu thil awmzia zawng zawng ka la hrilh lo nain Mâma chu a rawn lang nghâl thuai a, kan che rum rum a nih deuh ber chu. A chhan chu kan muangchàn viau chuan Jakob-a'n kan thil tum hriain min chelh ka hlau a ni, ani chuan thil dang, hming chhiatna leh mualphona lam a ngaihtuah thleng phâk duh lo ang, a duhna chauh a dah pawimawh ang a, ka ei siam kher a duh chhuanlama hmangin a duh chu ka chungah a ti mai dâwn a ni, kei lahin hnar ka thei si lo, duh viau mah ila ani hi ka duh phâk a ni lo, a sâng lutuk! Miin hre phei se chuan min nuihzatin zak lo min ti hlawm viau ang, Officer leh a chhiahhlawhnu inkâr chu zâu ve deuh mai asin, an dinhmun a inthlau lutuk!

A office hlànin in luah chu kan sawn ta rum rum a, bungrua kan ngah tehchiam lo chu kan vànneihna a ni, kan buai vak lo va. Ka buaipui ngai tehchiam lovin Mâma'n a buaipui thei bawk a, pu ber quater lama ka chêt pawh a tibuai hran lo ve. Tlai lamah pawh eirawng ka bâwl leh thlap a, ka bàwl zawh hmain a rawn haw hman ang tih ka hlau viau a; mahse, ka han ngaihtuah chiang leh a, amah ka hmuh tàwpna tùr pawh a ni tawh maithei asin tiin, rawn haw hmanin hmu hman pawh ni la pawi ka ti tehchiam duh ta lo va; mahse, a rawn haw hman ta lo, vawiin tlai chu a rawn bâng har riau mai. Jivan-a hnênah a pu lehkha tùr chu ka dah thlap a, naktûk lamah chauh pe tùrin ka hrilh a ni, ani hnênah pawh ka hna chu ka bànsan dâwn a ni tih chauh ka hrilh a, ka haw dâwn tih leh in kan luah sawn tawh tih pawh ka hrilh chuang lo.

Zîngah sumo-ah ka chuang a, kan khaw lam panin kan tlãn ta vang vang mai. Tihian, second tinin Jakob-a awmna khawpui ka hlat deuh deuh zêl chu a ni ta si a, hmuh pawh kan inhmu tawh kher lo ang, damin hrisêl se, hlim se, nupui țha deuh nei se tih hi ka duhsak a ni. Tu hmeichhia pawh a hlimna a niha a hlimna thlen theitu an nih phawt chuan ka duhpui thei vek mai ang, ka rilru erawh nat chu a na ve rih ngei dâwn a; mahse, inhmuh loha chanchin inhriat lëm loh chuan nghilh chin leh dam hun a thleng ve mai ang, khuareiin mi a hnèm ţhin an tih kha.

Mahse, ka va ngai dâwn tak! A hmêl ka hmu thei tawh lo ang a, a thil sawi ka hnial thei tawh lo bawk ang a, a nui suk hmêl pawh ka hmu thei tawh dâwn lo.  Pathianin dinhmun inthlau leh rualkhai lo leh lutuka mihring a lo siam hi chu aw ka ti rilru vawng vawng mai. Lunglei kan pelh dáwn tak tak chuan hnung lam chu ka hawi lét a," Mang țha le, he ka thil tih hian i thin lo ti rim lo hrâm se, hlimna tam tak lo nei mawlh ang che," tiin ka phun sap a, ka bula chuangte lah chuan ka rilru hre lo zet chuan hla an ngaihthlâk chu an zàwm dal dal a.

*MI DANG ZAWNGTE AIA ȚHA NIA LAN HI THIL HLAUHAWM TAK A NI A, CHAK LOHNA RÊNG NEI LO LEH DIK LOHNA NEI VE HAUH LO NIA LAN PHEI HI CHU A HLAUHAWM ZUAL, ÎTSÎKNA LEH THÎKNA LO LANGIN HMÊLMA INSIAMNA BUL A NI*