☆MIN EN LA☆ - 25 By Dingdi Pachuau

 ☆MIN EN LA☆ - 25 By Dingdi Pachuau

Ka haw tùr hi Nunhlima kha chu ka hrilh ngei, a chhan chu in luah tùr kha min hmuhsak a nih bâkah hna thawh tùr chungchângah pawh chuti tho, a hre lo thei lo a ni. Tlereuh dàwra thawk tùr pawhin Mâma nèn dàwr neitute an hmu dùn thlap, a hruai thlap a ni, mi fel nih a tling a, hetiangin min han beisei ve tlat mai hi a rûk tak chuan ka inthlahrung hial zâwk, a chhan chu pu ber bula ka awm dàn a hre hauh si lo va, kei lah pâwn lamah chuan nula fel nia lang siin pu ber bulah erawh nula sihhnip ang mai ka ni si, humsual dai ta lo mah ila a hmêl hmuh pawh ka hreh zo tawh a, ka inthlahrung dûk tawh rêng a ni. Haw rih lo tùrin min sâwm ve nasa a; mahse, ka lo tum tawh a nih bâkah tûn hun bâka hun remchâng dang ka hmuh tawh ka ring lo a ni. 

Tu tute emaw min rawn biak hlauin zîng kár ațangin phone ka off tlat a, Jivan-a'n ka lehkha ziak kha pu ber chu pein a chhiar daih tawh ngei ang a, min rawn biak a tum ngeiin ka ring, ni lo, tum ngei lo maithei tho bawk, kei hi a lakah ka lo indah sâng deuh viau a ni lo maw? A hnuaia thawk ve mai ka ni a, engah nge min ngaih pawimawh viau ang? Ka duh a, ka bànsan ta a ni mai a, bansan duhtu na nâ nâ chu engah nge phone-a min rawn um zui ka rin tlat a? A bialnu ka ni hleinem.

Kawng tluanin ka țawng mang lo. Motor ațang pawhin ka chhuk peih ve lo va, ka țhu tlawk tlawk mai a ni. Mi min biak hlauin ka muhìl der tlat bawk a, ka țhutna a fuh deuh bawk nèn, ka duhthusàm ang chiahin biak pawh ka hlawh lo; mahse, ka vui lo chiang.

Ka nu hnênah chuan ka haw chhan chu pehhêl ru ve deuh chuan ka sawi a, pu ber nèn kan inkára thil awm erawh ka sawi lang lo, tihian a tàwp mai dâwn a, sawi chhuah kha awmzia a awm lêm lo. Mi hnuaia thawh rau rauah pawh hna nghet lo leh lutuk a nih avànga bànsan ta angah ka insawi a ni deuh ber, dâwt pawh a ni chuang hleinem. Ani pawh chuan," A pawi lo, i awm bo rei ve tawh a, ina han awm ve rèn ráwn pawh hi a țha ngai, i zârah tunah chuan rethei bakberh takin kan awm tawh bîk lo a, kan dam țha a nih phawt chuan Pathian zârah kan bet bîk lo tùrah ngai bawk ang," a lo ti ve mai a, ka nu bula awm hi chu a hahdam thei a nia, rilru hah leh hrehawm tih deuh châng pawhin thinlung a thâwl huai huai thei țhìn a ni. Ka pu lah chuan," Ka upa ve tawh a, ka hun hnuhnung lamah hi chuan ka kiangah awm tam ve tawh la ka lo ti țhìn a, i rawn haw hi ka lãwm khawp a ni, kal tawh miah suh aw," a lo ti ve chuar chuar bawk a, ni e, hma lam hun tùr ka la ngaihtuah peih rih lo, chhûngte bula ngaihtuah nei lêm lova awm rih hi a țha ber.

Ni hnih kan khuaah ka awm ta. Ka phone chu ka on ve tawh nain ka hman duh hunah chauh ka on a, a hnuah ka off nghâl zêl. Phone call lo kal a awm hran lo va, kei hi ka lo indah sâng mah mah tih ka hre chhuak ta zél bawk. Pu berin min rawn be lo va, min rawn biakte kha ka han ring thut thut kha a nia, ka zak tawh zâwk!! Mami'n min rawn bia a, kan inbe rei lo, ka haw tih ka hrilh hauh lo va, ani pawhin a la hre tih ka hre mai, a unaua chuan a la hrilh miah lo a nih chiah hi, ni e, engah nge a va hrilh ngawt ang? Ka haw tâk avànga buai ruai tùra ka lo ngai kha a dik lohzia ka hre chiang zêl a, ka zak ru reuh reuh tawh bawk a ni.

Ni hnihna a ral a, ni thum, ni li lai a ral leh ta, thu thar a awm lo va, thil thleng thar pawh a awm lo, min rawn țhâwng thut mai ang a tia rilrua hlauhthàwn deuhna ka neih pawh chu a thâm ral țan ta, ni e, engah nge chutiang chu thleng tùra ka lo beisei ni? Ka beisei sâng mah mah!

Inrinnîah kan leipuiah kan feh a, leipuia ka han feh thei leh ta chu ka lung a lêng reuh kher mai, bêkte bul vëlah chuan pangpar țhenkhat an lo la pâr a, a țhen lo chuai tawh an awm ve bawk a, ka nu hian a uar ve thei a, hmuh pawh hi a nuam viau țhìn rêng a ni.

Leipui a nihna ang takin a zau lo va, a lo fai êm êm bawk si a, hawi vêl pawh a nuam khawp mai. Thlai awm chhun chhun chu kan zawng khâwm a, Mercy pawh bêkteah chuan a lo awm duh bîk lo, kan kalna apiangah a lo kal ve zêl a, a zai pah vak vak a, khua a ti har lo ve khawp mai.

Kan pathuma kan kal vek avàng leh zàn lama inkhâwm a ngaih dâwn avàngin kan haw hma ve deuh a, Mercy a inbual hmasa ber a, chutih chhûngin ka nuin chawhmeh tùr lo siamin keiin in ka tifel a, kan in hi a hmaa mi kha kan sa țha hran lo nain kan siam țha deuh vek tawh a, kan tân chuan a thar ang tho a ni a, tihfel zung zung pawh a awlsamin a nuam tawh bawk a, nawm pawh a nuam ve viau tawh rêng a ni. Ka tihfel zawha tual ka phiah fai hnuah chuan ka inbual ve zat a, kan chêt ran deuh hlek loh chuan zànah kan inkhâwm hman lo palh ang.

Zanriah ei khama thlèng ka sil laiin kawngkhàr chu a rawn ri karh karh a, Mercy chuan hmun phiat pah hian a lo chhàwn vat a(ani hi kan inlëngte lo chhàwntu a nia) ka lo en lêm lo nain ka nuin," Lo lêng rawh, lo țhu rawh khai," tia a lo biak chuan ka hawi phei zawk a, ka hawi lêt leh rang lutuk ringawt, a lo kal ka rin êm êm; mahse, ka rin phâk tawh loh ngei a lo ni si a, ka lài nghâl hú mai. Eng nge a lo tih? A thin a rim viau ang em? Ti ila thinrimna chhan tùr a nei hauh lo, ka duh hun hunah ka bâng thei alawm, thla a laklawh viau pawh a ni chuang lo va, kâr khat chuangin ka la bonus zui, lãwm hlê zâwk tùr a ni.

"Khawi lam ațangin nge ni le? Ka hmu ngai lo chein ka hria," tia ka nuin a biak leh chuan ani chuan," Lunglei lam ațangin, Jakob-a ka nia, Rêngpuii nèn hian kan inhria a, he lamah ka rawn kal remchâng sia tiin hmêl hriat awm ta chu ka rawn tlawh kawi a nih hi," a lo ti ve mai a, he lamah a hna thilah a rawn kal tihna em ni? Mahse, ka ring chiah lo deuh, hêng lai lai hi chu a rawn bial phâk lo ang...

"A nih tak chu, thlèng a sil mêk a, a zo țêp tawh ang," ka nu chuan a ti a, thlèng chu ka sil zo titih dér a; mahse, va pawh ka hreh ngawih ngawih, inkhâwm tùrin chhuahsan ta daih ila a mawi lo viau ang em? Ka nu lah saw, inkhâwm a tum hmèl bawk si, a va buaithlâk tak! Kan pahnih chauha ina lo awm chu ka huphurh asin.

Phei loh theih ni hek lo le, ka phei a, hmu thut ni àwm tak hian," I lo kal elo? Eng nge i rawn tih dâwn?" tiin ka han bia a, hmël hriat loh angin a awm theih tlat loh, ka nu bulah khân inhria angin a lo sawi tawh bawk si a, ka biak loh chuan ka nuin mak min ti lutuk palh ang. Chuan, han en chian deuh tâkah chuan a lu buk deuh hlek vàng nge a lang chêr deuhin ka hria!

"He lamah ka rawn kal remchâng a, ka rawn tlawh che a nih hi," a ti tak nain min rawn tlawh mai mai tum a nih ka ring lêm lo, a thin pawh a rimin ka ring, amah hrilh lâwk hauh lovin ka hawsan si a.

"A nih tak chu, khawiah nge i innghah a? Engtia rei nge i awm ang?" ka ti leh a, ka nu a awm ve reng sia, han biak loh ngawt dáwnin ka nuin mak min tih ka hlau sî a ni. Ka thu chu ni se chuan ka be hmasa kher lo ang, kan in mah ni se.

Ka nu chuan," Bawihi, thingpui han lum ta che, a rawn tlawh vang vang che a nia, kei pawh inkhâwm tùrin ka'n insiam ang e," a ti a, a tho zui ta nghâl a, room lama awm Mercy chu a ko zui bawk a. Kei pawh chu ka tho zui nghâl a, gas-ah thingpui no khat tùr àwm chu ka chhuang a, kan in hi zau lutuk ni lo hian room țhen tê tê kan uar a, tuna a țhutna hi kawng lama awm niin kan ina lût tùr chuan pal tlang hmasak ber ngai a ni.

A so ka nghâk a, ka siam a, ka va pêk lai chuan ka nu pawh room ațanga rawn chhuakin," A nih leh, kan va inkhâwmsan ang che u, i lo lêng reng dâwn nia," tiin țha takin a thlah a, ani pawh chuan," Aw le, inkhâwm tui le," a ti ve nghut a, a lèn reng erawh ka beisei lo khawp mai thung.

Ka nute chhuah hnu chuan a reh tlawk tlawk mai, ka en ngam chiah lo deuh a, ka nu bulah kha chuan a nèlawmin a fel hmèl a, a polite viau kha a nia, tunah erawh chuan a lang nèlawm leh vak tawh loin ka ring, a mitah tak phei chuan ka la en lo hrim hrim.

"Engati nge i tlàn bo daih a?" a rawn tih chuan ka en zawk a, min lo en ngur mai a. Tlãn bo ni chiah lo mah ila chutia min tih tâkah chuan tlãn bo tia sawi theih chu ka nih duh hmèl riauin ka inhre thar ve deuh a.

Mahse," Ka tlãn bo lo, tlãn bo ila min hmu tawp lo ang," tiin ka chhâng ta zâwk a, tlãn bo han intih chu a mawi chiah lo deuh a ni.

"Ka hriat lohin i haw miau a."

"Lehkhain ka hrilh reng che kha."

"Ni e, i hriat lohin ka haw a, min hre thiam mai teh, ka hrilh duh lo che a nih kha," ka ti duh teuh bîk lo mai! A ngaih ngaihin ngai rawh se, ka tlãn bo chuang lo.

"Mi sual chu ûm lohin a tlãnchhia an tih ang chiah kha i ni, in luahna i sawn a, ka hriat lohin. Chuan, biak pawh theihin i awm lo bawk a," a rawn ti leh a, vawi khat tê pawh min rawn biak a tum hauh si lo va, biak pawh theih loh min han ti ve ngawt a nia, han chhàn lêt  viau deuh duh mah ila awmzia awm vaka ka rin loh avàngin," Mi sual ka ni chuang lo, i hnuaia thawh tawh loh miau chuan kha laia quarter kha luah reng thu a awm hleinem," awka dam pângngai tak chuan ka ti a, chutah, thu dang daih zâwtin," Engtikah nge i haw dâwn? Naktûk lah chu Pathiannî a ni tawh si a," ka ti ta daih a.

"Pathiannî a nih avàngin a haw theih loh tihna a ni lo," a lo ti nghut thung a, thingpui chu a han dût hlak a," Chawlh hmangin i haw ve lawkah ka ngai ang, bànsan lam erawh ngaihtuah lovin i hna rawn zawm leh thuai ang che, nge ka rualin i rawn haw ve nghâl mai dâwn?" a ti leh zat a. Chutiang lam chuan thil a sawi ka lo ring hauh si lo va, a thinrim deuh hi chu ka ring sa a, thawk leh tùra min tih leh erawh hi chu ka ring pha hauh lo, ka tum lêm lo bawk a.

"Min hre thiam mai teh, hlawh a țha lo ka ti lo va, min duhsak êm êm bawk, hahthlâk pawh ka ti chuang lo; mahse, ka thawk thei tawh lo ang, Mâma'n Zotei lah a awmpui pah thei tho bawk si a, ka nu puih ka duh ve tawh a ni," ka ti duah a, ka hnial ngei ngei hi a ngai a ni tawp. Han chhuanlam mai tùr erawh a vâng ka ti, tuna ka chhuanlam lah hi a dawrâwm riauin ka hre zui.

A ngawi vang vang a, min rawn en reng tih ka hriat vàngin ka en duh lo lui tlat a, ka chhàn dàn avàng khân a thinrim ang em? A hmêl ka en tlat loh avàng chuan chu chu ka hre thei mai lo.

"Kan inkâr vàng kha a ni tiraw? I hlauhthàwn vàng a ni, ka ti dik em?"

Min man chhuak chiang lutuk mai si a, ka en zawk nghe nghe. Thutak zet hian min lo en kur a, hawi sawn vatin," Kan inkârah eng mah a awm hleinem, hlauhthàwn tùr lah ka nei hek lo, engah nge ka hlauhthàwn ngawt ang?" mahni invêng tak leh inrintâwk hmèl zet hian ka ti a, a rûk tak erawh chuan ka inringtâwk lo nasa, a hriat ka hlau viau bawk.

"Tak tak?" A awka chhuaka nuihzatna tel chu ka hre thei, ka thil sawi chu a ring hauh lo tihna a ni. Ni e, kei ngei pawhin ka ring chuang hleinem, ka invèn nâna ka sawi mai a ni si a, chhàn erawh ka tum lêm lo.

"Kan inkârah hian eng mah a awm lo tak tak maw?!! I chiang chiah em?" a rawn ti leh ta chiah a, hetiang lam sawi thui hi ka duh lo, kan inkârah eng mah a awm lo tih hi ka ngaih dàn tùr dik tak a ni.

"Hei, dawhkàn chu a awm a nih hi," tia nui chung hian dawhkàn chu ka kâwk zauh a, chutah," Boruak pawh a awm bawk," ka ti leh a, ka va en zauh bawk a, a lo nui ve hauh lo. Inhma chhawna țhu kan ni a, țhut loh theih ni hek lo le, țhutthlèng kan hùn dàn a ni miau si a.

"Fiamthu thawhna chi a ni em ni?" a rawn tih hmuk tâkah chuan ka nui tàwp chiang kher asin, ka chhàn dàn avàng chuan a lungawi lo a nih chu. A ho thei, fiamthu ka thawh ve zauh a ni mai a, ani ang lehkha zir sâng leh patling țhan kin tawh (ka ti mai) phei chuan lo hriat thiam viau àwm tak, chhe hmek hmuk êm mai a.

Thingpui no chu ka tleuh a, a bulah pawh ka va lét duh lawk rih lo. Vànneihthlâk takin ka ti dáwn nge, ka nute pawh an rawn bâng thuai a, Pi Zârliani rawn lût tel ve bawkin a rawn țawng lút bawrh bawrh a, ka nuin Jakob-a a hmuh chuan," E, i lo la awm maw?" tiin a be phawt a, Pi Zârliani hnênah chuan," U Zâr, lo țhu rawh, ka han inthlâk lawk ang e, Bawihi, thingpui kha aw," a ti leh zat a, kei pawh chuan thingpui chu ka chhuang leh a.

Jakob-a chu ka be vak lo bawk a, a ngawi deuh reng mai. Ka nute pahnih erawh chuan an be zawh zauh thung a, an biak châng chuan țha takin a lo chhâng ve zêl bawk a. Ka nute rualin thingpui hâng ka pe leh a, a in zawh hnuah chuan haw tumin a ding ta uaih a, ka nu chuan," Haw i tum mai elo? A la hma alawm, khawiah nge i innghah rêng rêng a? Tu inah nge ni?" tiin a han zâwt leh hnuhnawh a, ani chuan," Innghahna pawh ka nei lo, tihian ka tlãn haw char char mai ang chu," a lo ti ta mai! Ka en hau ringawt a, ka nu chuan," Ta mai mai chuan, a va hahthlâk duh àwm ve! Hetah riak mai la, naktûk lamah muangchângin i haw mai dâwn alawm," a lo ti vat a, ani erawh chuan," Ka lâwm khawp mai; mahse, haw thuai ka ngai si a, ka haw mai ang," a ti a, a chhuak tùr chu ka han thlah khawmawi ve a, car a lo keng reng niin, a rawn luh hma khân a thãwm ka lo hre hauh lo, ka pute kawt piah deuhah a lo hûng a, ka en zui deuh reng a, chak zetin a tlãn chhuak zui nghâl daih a.

Ka ngaihtuah zui rauh rauh a, min rawn tlawh tùr hrim hrima rawn kal a ni nge a zinna lamah a rawn kual remchâng zâwk ni ang? Amah chauhin maw? A sawi dànah kha chuan a ni ngei mai a; mahse, tikhân tlàn haw vang vang a tum chu a nih hmèl bawk si. Tunah lah dâr 8: 30 vêl zet a ni tawh a, zankhuain a tlãn mai dâwn tihna a ni a, a chauhthlâk ngawt ang chu, eng nge maw zanin chûk chûka haw kher pawh chu...

Ka mut dâwn hnaiha ka hmai ka phih laiin ka phone chu a rawn ri a, Mâmate emaw Nunhlima emaw an ni maithei tiin hmanhmawh tak chuan ka phone dahna lam chu ka pan vat a, number ringawt mai ka hmuh chuan ka thaw hak ringawt. A number save kher lo mah ila tu number nge tih zawng ka hre chiang viau a ni.

"Hello?"

"Ka number pawh i save duh lo va; mahse, min block ëm lo va, a làwmawm tho e. I mu tawh em?" a rawn tih thùm deuh dút dút chuan a hmêl chu ka mitthlaah ka hmu rauh rauh a, min zawhna pawh chhâng ta mai lo chuan," I haw tak tak em ni?" tiin ka zâwt thung a. Ani chuan," Ka haw mai loh nâkah, riak tùr pawhin min sâwm hleinem," a rawn ti nghut a, kei erawh chuan," Ka nu pawhin a sàwm reng che kha," ka ti ve thung a.

"Nangman min sâwm hleinem."

"Engah nge ka sàwm ngawt ang che? Ka bialpa pawh ni hlei lo, hlatsan che ka duh zâwk a nia,"ka ti rilru țhuai țhuai a; mahse, chutiang chuan ka chhâng chhuak ngam teuh lo. Ka nute'n ka țawng an hre pha vek àwm si a, chuvàngin ka țawng ring ngam lo, thil pawi kan sawi tihna ni chuang lovin nuam ka ti lêm lo a ni. Mut dâwnah lehnghâl, thãwm a reh tawh a, ka pute in piah deuh in ațanga woofer play la ri deuh dap dap tih loh chu thãwm hriat tùr dang a awm tawh lo.

"Nia..." ka ti ta ringawt a, a rûm deuh nghut a," Min khawngaih lo khawp mai, ka chau ve asin le," a rawn tih chuan mahni inthiam lohna ka nei deuh thut a, ni e, lo sàwm ve chhin hrim hrim tùr a nia, ka nu sàwm kha ka lo ring ve ringawt mai bawk a ni.

"Kawng lakah riahna tùr hotel pawh a awm ang chu," ka ti ta sap a, mi khawngaihna nei lo tawp chu ka ni bîk lo, ka khawngaih ve tho; mahse, ka khawngaih avànga a duh ang zêla hun hman ka tum lo, ani chuan ka ei siam thiamna leh min la mutpui loh avàng chauhin a ina thawk leh tùrin min rawn sâwm a ni, sâwm pawh a ni chiah lo, min rawn hrilh a ni zâwk mah ang chu.

"Chau viau mah ila ka tlãn char char mai a ni ang chu, min sâwm la chuan ka riak ngei ang," a ti leh chuan," A nih tak chu, nia, tlãn char char mai rawh," tiin ka chhâng a, a tlàn char char loh chuan a thleng har ang, kawng a thui tham ve bawk si.

"I va sual thiam tak! Heti taka min tiduhdahtu hmeichhia hi ka la tawng ngai lo, chuti chung chuan ka la rawn pan ve hrãm hrãm tak che chu a ni si a, kârleh lamah chuan lo inring ang che," ti hmukin, phone chu a hmet tawp zui ta nghâl daih a, phone chu hrilhhai angreng takin ka en deuh reng ringawt a.

Engtin nge an lo hriat hman teh rêng ni, a tûka ka inkhâwm bâng chu min ngamtlâktu ve deuhte chuan min lo fiam hmanhmawh a!

"In pa chuan a rawn ûm zui rawk rawk che a ni maw? Engtikah nge kan tih huk dâwn?" an tih loh leh," I vànnei dâwn khawp mai, he lamah pawh in rawn zin zauh zauh ang chu," an ti a, a ngaihna ka hre lo lek lek țêp a; mahse, Jakob-a motor kha an lo hmu a ni ngei ang, kan inah a rawn kal bawk sia, a àwm ve tho mai.

Mahse, a hnu lama mi min sawi dàn ka hriat leh chu," A bialpa chu putar lam deuh tawh a nia; mahse, a hausak hmèl viau thung, a hausak vàng a ni ngei ang," an ti a, a țhenin," Engtin chiah nge a awmna lamah an zuk tàl kan hre chiang lo, a rawn ûm zui dànah Rêngpuii hian eng emaw thilah lungawi lohna a nei a ni ngei ang," an ti bawk a, inti hre chiang deuhte phei chuan," A mipa kha a patling tawh sia, nupui fanau nei tawh a ni ngei ngei ang, a hmeichhia lah a rawn haw thut bawk si a, mi chhûngkua a tibuai a ni ngei ang, a rai hial a ni lo maw le?" an ti bawk, a râpthlâk ka ti tak zet a ni. Ka pitei min hrilh a ni nghe nghe a, ani hi chuan rual a pâwl zau a, thil  pawh hi a hre thei viau bawk a ni.

Ka nu pawhin a lo hre ve ngei a ni, zan khat chu Mercy lehkha zir lai chuan," Bawihi, lo țhu hnai lawk teh," tiin ka chanchin chu min han zâwt chiang ta a, kei pawhin zëp țhen ka tum tawh lo, thil awmzia chu ka han hrilh ta vek a, ani chuan," Lo kal kha i pu maw ni a?!! I hmel hriat satliah a ni ang chu ka lo ti mai asin, a la upat vak loh kha," a ti a, kei chuan," Upa vak nâng, rei lo tê chauh an la innei tihah a nupuiin a boralsan hlauh a, tihian nupui nei lovin a la awm ta reng a nih hi," ka lo ti ve a.

A ngawih vang vang hnu chuan," A nih, amah kha pasal atân i duh rêng rêng em? Ka tih awmzia chu amah khân neih duh ta che se?" a rawn ti chhuak ta rãwih a, mak ti zeta en pah hian," Nu..!! chutiang te chu..." ka ti ta ringawt a, hetiang lam hi kan sawi dun vawi khatna a ni a, ka zah deuh bâkah chutiang thleng thlenga min zâwt chu mak ka ti a, chhàn ngaihna pawh ka hre lo a ni.

"A fiam mai mai lo thei ve tho che a," a ti leh a," Teuh lo mai! Bialnu pawh a nei reng alawm, a rawn pan ziah a, kei angte chu engah mah min ti tak tak teuh lo! A tân chuan hmeichhia an tam lutuk ringawt!" uar zet hian ka lo ti tàn tân a, a ngawi leh deuh a, a hnuah chuan," A nih leh, a rawn kal chhan kha, a hnênah chuan thawh leh i tum tho em?" tiin min zâwt leh a, kei chuan," Thawk tawh lo ang, ka thawh duh tawh loh avànga rawn haw daih ka nia, ka thawh leh chuan awmzia a awm nâng," tiin dik takin ka chhâng a.

Ka nu hnêna thil awmzia ka hrilh vek hnu chuan ka rilru pawh a zãng hawk mai, mi chuan min la sawi reng ang. Ni e, an duh duhin min sawi thei miau a; mahse, thu dik tak erawh an hre lo, sawi lah ka tum hek lo, an duh duhin lo sawi ve mai mai teh se.

Min rawn be leh tawh miah lo va, kei pawhin ka be hek lo. A bula thawh leh tumna ka neih loh bâkah a lak ațanga inthiar fihlim hmak ka duh, ka thinlung leh taksa ka la thunun theih laia amah hlatsan hi ka himna bul chu a ni. Rilru nâa awm ka duh lo va, rilru leh taksa min hliam hnua ka hlatsan chuan awmzia a awm taeh dâwn si lo va. Mami pawh ka thawk tawh lo tih  ka hrilh a, a chhan chu hrilh lo thei lova min siam vàng a ni, Lunglei lama rawn zin phei a tum thu a sawi a, chuta ţang chuan ka awm tawh loh thu ka sawi chhuak ta a, a chhan min rawn zâwt chîk khawp mai. Kei erawh chuan Zotei ka hrilh ang tho chuan ka hrilh leh a, Mâma tân lehkha zir pahin hna a thawh theih a, Zotei a awmpui pah thei tho bawk a, ka tân awmin awmzia a nei tawh lo a ni.

"Ka âwih lo, engtin emaw tak a hau che a ni lo maw? A hau che a ni ngei ang, ani hi chu aw, a nèlawm loh bâkah a duh dàn ang thlapa mi hi awmtîr a tum tlat a, a sim hlei thei lo, chuvàng a nia a bulah pawh mi an thawh rei theih loh ni, mi rilru tùr hi a ngaihtuah pha lo rêng rêng!" a ti ta bawrh bawrh a," Min hau lo," ka tih pawh chuan a âwih ta dèr lo mai!

"A ni lo thei lo! Min rawn hrilh daih tawh tùr che a nia, ngawi tak rawh, ka'n hau ve hrep ang e! A awmpui tur pawh ka zawnsak tawh lo ang, a zahthlâk zozai tawh! He khawvêlah hian a duh ang thlapa mi fel famkim an awm thei ngai dâwn lo tih hre rual a ni tawh! Mi chu sawi loh, amah pawh a ma duh ang thlapin a awm thei nâng! Ka'n phone nghâl ang e," a ti leh bawrh bawrh a," Ni lo, i hre sual a nih kha, min hau lo," ka tih lawm lawm pawh chuan a âwih duh chuang lo," A chunga ka lungawi lohzia hi han hre ve phawt teh se," a ti leh tlat a, kan inbiakna pawh chu a ti tàwp zui nghâl a.

Hrehawm ka ti lehling zâwk! Awmze awm lo leh a thiam loh pawh ni miah loah a unaupa chu a va àn khum hrep dâwn chu a ni tak si a! Ka va be hmasa mai dâwn em ni ang? Mahse, eng nge ka sawi chuan ang? Engtin nge ka tih ang? "Mami'n a rawn hau dáwn che," tiin maw? "Eng vangin maw?" lo ti ta se, engtin nge ka chhàn ang?

*PÊN KHAT TÊ TÊ HIAN KAN HRINGNUN KAWNG CHU KAN ZAWH CHHO A, MÊL SÃNG TAM TAK KAN KAL A, KAN LA KAL ZÊL A, KAN ZAWH CHHUAH HUN TÙR LAH CHU KAN HRE HAUH BAWK SI LO*