☆MIN EN LA☆ - 26 By Dingdi Pachuau

 ☆MIN EN LA☆ - 26 By Dingdi Pachuau

Mahse, ka va phone ta êm lo. An duh dàn danin inàn khum mai mai teh se, mawh ka phur lo ang, ka lo buaina tùr a awm ve tawh lo, thinrimin min rawn hau ve dâwn pawh ni se ka khuaah ka awm daih tawh tho, ràlkhat ațang chuan a hlauhawm lo êm mai.

A ina thawk tùr chuan min rawn sâwm nawn tawh lo va, kei lahin thawh chhunzawm ka tum tawh chuang lo bawk. Mami hnên ațangin mi dang chhawr lovin Jivan-a chu engkimah a chhawr tih ka hre zui a, vai niin ngei viau mah se mi dang han zawn buai vël kha a peih lo a ni ngei ang, Mami ber lahin a thinrim khum tawh àwm bawk si a. Ni leh lo, Polite-i a nei tak alawm, mi dang zawn buai a ngai lo, a awmchilh thei tawh bawk ang chu. 

Inhmu lo leh inbe ngai lo ta chu ka vei zui tho tak nain thil dang tih tùr leh hmêl dang dang ka hmu bawk a, ka ngaihtuah rùn hman tawh bîk lo, buaina hrang hrang ka nei ve a, zànah Mercy lehkha ka zirtîr a, chhùnah hna ka thawk bawk a, ka nu chu ka theih chin chinah àwl ve hrâm hrâm ka tum a ni. Jakob-a chanchin chu a hmaa min zawh bâk kha vawi khat dang min zâwt leh a, bialnu a neih thu leh min duh tak tak ka rin loh thu hrilhin ka tâna tum phâk a nih lohzia, beisei ve chî ka nih lohzia  pawh chu ka hrilh tel nghâl vek bawk a, a sawi nawn leh tawh lo. 

Zan khat chu Mâma'n min rawn biain," U, vawiin tlai chu i pu hlui kha a rawn lëng a, Zotei'n i pu hlui niin a sawi. Naktûk tlaia a ina zanriah ei tùrin Zotei nèn min rawn sâwm a," a rawn ti a, kei chuan," Eng maw?!!" ka lo ti vat a, ka meng phâwk ngawt ang chu! An in luahna chu engtin nge a hriat chhuah theih? A lêng zui bawk a!! A mak ve êm a ni. Mâma chuan min tih der em ni zâwk le, ka ring chiah si lo, eng atân nge zanriah ei tùr chuan ka naute chu a sàwm ni? Mâma phei chu a hriat ngai pawh a ni si lo, Zotei tak chu ka hre thiam deuh hlek a; mahse... engati nge?!!

Zotei chu rawn țawng lang langin," U, en teh, vawiin chu eng a hria nge ni, kawr dum a rawn haw miah lo asin!! Choak pawh a ang tawh lo," a rawn tih chuan ka meng zãu kâwk a, ka mitthlaah a hmël, a pian leh a inthuamna zawng zawng chu a rawn lang nghâl uar uar a, thuamhnaw dum ni lo inbel tùr chuan ka han mitthla dâwn chhin a, ka hmu thiam hauh lo mai!

"Zote, engtiin nge a rawn lèn a? Engtin nge in awmna chu a rawn hriat theih?" tia ka zawh chuan ani chuan," Ka hre bîk chiah lo, zâwt mai rawh, in inbe țhìn tho a ni lo'm ni? Kan khuaa a rawn kal thu leh kan ina a rawn tlawh thu che pawh a sawi a, kan khua meuha rawn tlawh che a nih chuan kan in luahte zawng engah nge a hriat loh theih tehlul ang?" tiin min rawn chhâng a, sawi leh tùr ka vàn kher asin.

Zotei vëk chuan," Kan school-ah pawh a rawn kal tak asin, ka hmu nghe nghe a, auh vak ka tum a; mahse, ka zak leh deuh zâwk a, bâkah, rawn kalpui kha a nei bawk sia, ka insûm ta hrâm a ni," a rawn ti leh a, kei chuan," A nih tak chu, i ko vak ang tih a hlauhawm a nih chu, a zahthlâk duh àwm êm mai. Chuan, kan khuaa a rawn kal kha chu, hna lama a vah kualna lamah he lam a rawn tlän remchâng mai mai a ni ang," ka ti ve ta a, sawi zawm lehin," Naktûk chu, eng vàngin nge zanriah ei tùr chuan a sàwm che u a?" ka ti leh a, ani chuan," Ka hre chiah lo, a rawn kal remchãng sia, min sâwm ve tawp a nih ka ring," a rawn ti leh a, Mâma rawn inrawlhin," A rawn kalpuinu chhiat lohzia mai chu maw, ka tliak hnâwpin ka hria," a rawn ti ve leh a, ka meng tang hrû nghâl. Tu nge a kalpuinu chu ni ang? Polite-i maw? A lènpui deuh ngei a maw? An va nasa dùn tak!

Ka lo ngaihtuah leh vung vung țhìn, eng vàngin nge anni pahnih chu chaw eia a sàwm kher ni? Engtin nge in an luahna pawh chu a hriat chhuah theih? Hre sa lo chuan a lêng lo tawp ang, a hre sa tawh tihna a ni ngei mai a, engtin nge a hriat chhuah le? Ka ngaihtuah cheuh cheuh pawh chuan a hriat chhuah dàn tùr chu ka ngaihtuah chhuak thei lo.

Nula ni ve ta fam chu zànah tlangvâl inlêng ka nei ve zauh zauh a; mahse, rawn lêng satliah ve mai an ni, ka hawi chiam lo va, anni pawh min ngaihzàwn vànga rawn lêng an ni lêm lo, bâkah, kohhran țhalai lama inhmang ve deuh chin an ni a, inlêng leh inkàwm satliah ang kan ni, a chângin Muan-pathlawia kan tih mai, pathlawi hmel chhe vak lo chu a rawn lêng zauh bawk a, ani hi chuan min beisei ve deuh tih ka hre thei thung, a rawn lèn zauh châng pawh hian zu rim hi a nam ve thar thar thei ziah si a, hrehawm ka ti thei tawp. Lehkha zir sãng bîk lo rùi tih takah a nawi ve thei viau bawk nèn, ka ngaizâwng lo nasa bawk sia, a rûk hian ka ning ngawih ngawih a, nin avànga han hauh chiam thu lah a awm bawk si lo.

Zan khat erawh ka thin a tirim viau mai a, ka zak bawk nèn, țawng khum zêk ka duh tak zet a; mahse, ka nuin min mitmei a, ka insûm mai mai a ni. Ni e, kan hausa lo va, pa tel lovin ka nuin min enkawl chho a, harsa takin kan nung chho ve țâwk țâwk tih chu ka hria, chu lamah chuan sawi tùr pakhat mah ka nei lo; mahse," I hna thawhnapa pawh keimah ang tho a pathlawi, fa nei lo a ni lo'm ni? Kei chu ani ai chuan ka la naupangin ka la daih rei zâwk ang a, ani ang putar tawh pêk theih che aia lêta tam ka pe thei ngei ang che," a ti pek a, miin kan chanchin an sawi a hre ve tih hriat reng reng, zaidam takin ka chhâng a; mahse, a thil sawi chuan ka thin a tinâ, Jakob-a putar anga a chhuah chuan ka thinlung a tina tlat pek a! Putar a nih lohzia leh ani aia a țhat chungchuanzia han hriattîr pawh ka châk hial a ni.

Mi zêldin thu bàwl pawh hi a àwm ang thei viau tho chuan ka hre ve tho, an rilru a lo sêng nasa àwm hi ka tia, an rilru pawh a chak hlawm ka ti, kei ve mai mai chanchin an han sawi duh ve a nia, an hman khawp mai. Ka putea nupui Pi tei hian min hrilh țhìn a, Sângpuii rài thu pawh ani hnên ațanga ka hriat hi a ni nghe nghe, ani pawh hi mi chanchin a hriat theih dànah a țawng duh ve viau tho a nih ka ring, thil hre thei deuh nih hi chu a țha vak lo asin.

Thlasik khua a rawn ințan țêp tawh a, khaw lum tak tak a inher liam a, Favàng hun nuam kan hmang chho leh a, boruak a nuam thei si a, thlasik lo thleng tùr hi ka huphurh thei viau țhìn a ni; mahse, hun ngaia awm reng theih ni hek lo, hun nuam hmang tùrin hun hrehawm kan pal tlang te a ngai a, hun hrehawm a inher zawh hunah hun nuam chu a lo thleng leh thei țhìn a ni. Chutiang chiah chuan hringnun pawh hi a inher ve țhìn a, hlim nî a lo thleng a, kan hlimnain a daih reng sêng bîk lo va, hun nuam tak bul lawkah hian țahna leh lungaihna hi a awm ve reng a, a rawn inher chhuak ve leh ţhìn a ni.

Nunhlima'n min rawn biak avàngin Mercy lehkha zir ka tihbuai hlauin room lamah ka lút a, a lunglèn thute chu min rawn hrilh kûr dup a, ka nui hak hak a, kei pawh chuan ngaihawm ka tih thu leh dàwr nghah tùr leh in luah tùr min hmuhsak avàng chuan làwmthu ka hrilh ve leh bawk a.

"In khuaah chuan rawn zin vang vang a chákawm ngawt mai!" a tih chuan," Rawn zin la, a nuam ve riau asin. E, Krismas rawn hmang la," tiin ka han sâwm zui a, ani pawh chuan," A fuh viau tak ang! Ngawi tak rawh, a hun rawn thleng hnai deuh se, ka duh tak tak ang!" a rawn ti  ve a, rei ve pângngai tak chu kan inbia a.

Kan inbe zo chiah tihah ka phone chu a rawn rîk zawm nghâl zat a, pu ber hlui a lo ni a," Engati nge ka biak tlang theih miah loh che a? Tu nge i biak ni?" a rawn ti nghut nghut a, a lung a awi vak lo a nih hmèl, kei chuan," Tlangvâlte pawh ka be ve bawk ang chu, eng nge ni ta?" ka ti zui zat a, ani chuan," Biak che tuma ka try nasatzia hi, tlangvâl dukdak lo a lo biak vàng vek! Engtikah chuan nge i rawn kal theih dâwn?" a rawn ti leh a.

"Ka rawn kal thei tawh lo ang, thawh ka tum tawh loh thu pawh kha ka hrilh ngei che kha," ka ti ve thung a, ani chuan," Kha kha chu i fiamthu a nih kha, kei chuan i rawn thawk leh ngei ang tih hi ka ring nghet tlat a ni, ka ring mai a ni lo, ka hria a ni," a rawn ti leh a.

"Rinna thawrawng a nih chu," ka tihsak meuh chuan a thin a rim viau a niang, phone a hmet tàwp zui hmak a, za lo zetin ka nui ringawt, naupang chhia lutuk mai; mahse, rei a rial lo, a rawn tinawn leh a, chhàn loh ka han tum zet nain ka chhâng leh ta a.

"Eng nge ni leh ta?" A haw leh viau ang chu. A rui deuh a nih ka ring ngawt a, a țawng dàn chuan a ang ka ti, Polite-i nèn an in dùn pawh a ni mahna.

"Luhlul chhuah suh, Rêngpui. Kan pahniha inkârah hian induh tawnna a awm a ni, haider luih țâlh tum suh,  nang hi chu ka chanpual tùr i ni," a rawn tih leh chuan za lo zet hian ka nui hak a," Ngawi teh, duh tâwk rih ang--" ka tih lai chuan min lo pawt chatin," Duh tâwk lo ve, nang hi ka fate nu tùr i nih kha! Eng pawh ni se ka tâ i la ni tho tho dâwn!" a rawn ti leh nghut nghut a, a thil sawi chuan min dêng deuh dawt a, a fate nu tùr min ti maw?!! A awmzia chu a fa pàitîr min tum tihna a ni a! A tâ ka nih tùr thu pawh a sawi, min tlàwm chu a tum ve chiang hlê mai maw.

"Țawng fîmkhur deuh teh!" ka ti deuh țhat a, a rùi ãin thil eng eng emaw a sawi tih a hriat reng mai, ani pawh hi Muan-pathlawia ang mai a ni, rùi chunga indàwr hi ka ngaithei vak lo; mahse, ani hi chu Muan-pathlawia lakah chuan a dang hle thung, biak nuam ka ti tho bawk si a nih hi.

"'Rawn lêt phawt rawh, i rawn lêt a ngai, i eirawng bàwl chauh lo chu ka ei duh lo tih i hria em? Chu chu thu dik tak a ni. Ka thih i duh loh chuan i rawn lêt ngei a ngai," a rawn ti leh a, a thil sawi chuan ka nuih a tiza thut a, nui hak chung hian," Lungngai suh, i thi hauh lo ang, i thi dâwn teuh lo mai!" ka ti a, ani chuan," Ka hma hun i hriat loh kha, Zotei nèn kan inkàwm ngeih hle si, engati nge nang hi i luhlul viau bîk ni?" a rawn ti leh a.

Ngaihtuah chhuak thutin,"Engtin nge an in luahna kha i hriat a?" tiin ka zâwt ta vat a, ani chuan," Ka hre chhuak duh a, ka hre mai," a rawn ti mai a, zawh chhunzawm lehin," Chaw eiah pawh i sâwm a ni àwm a, engati nge i sàwm kher a?" ka ti leh a, ani lah chuan," Ka sâwm duh a ni mai alawm, ka sâwm thei lo em ni?" a rawn ti ve thung a, min tidang leh dèr mai.

"Min hlau em?" 

Teh daih chuan! Hlau hran lo ve, engah nge ka hlauh ngawt ang?

"Hlau mai mai lo," tia ka chhàn chuan," A țhat nasat chu. I hmun ruak a la ãwl reng a, i rawn hnawh khah hun ka lo nghâk ang, i rawn hnawh khah ngei pawh a ngai ang," a rawn ti leh a, kei pawh chuan," Min lo nghâk duh suh, ka rawn thawk tawh dâwn lo, ka hman tawh lo, ina awm hi ka duh ve tawh a ni," ka ti ve leh duah a.

"Tak tak?"

"Aw..." ban deuh hlek leh zàwi deuh sap hian ka ti a, ani chu a han thaw hawk phawt a, chutah," Keimah ngei ka chêt chhuah a ngai dâwn ta zuk nia," a ti chhuak ta sup a. Ni e, a hna thawk tùr chuan amah ngeiin a duh zawng se, a fair ber bawk ang, mi dang zawntîr leh ngawt țhin chu a fuh vak lo, a duh khirh ve bawk si.

"Good luck!"

Kan inbe lo ta vang vang a, a duh zâwng tak chu a hmu ngei tùrah ngai ang. Amah meuh a chêt chhuah chuan a hmu hrim hrim ang, kei chuan ka hnaih ngam tawh lo, a bula ka awm leh hlauh chuan ka insûm thei tawh àwm si lo, tunah pawh ka duh a ni tih a hre reng tawh a nia; mahse, khua hmunah kan awm lo va, a la zia tal. Awm dun chuan a bialnu kha a bulah a awm ve leh bawk ang a, a thlah chuang bawk si lo va, rilru na takin ka awm dâwn asin.

Krismas chawlh hmang tùrin Zotei a rawn haw hmasa deuh a, a hnu lawka Mâma a rawn haw ve leh a, dam taka chhûngkua kan han inhmu khâwm tlâng leh ta chu a nuam dar dar viau mai. Tunah hi chuan kan rilru pawh a puitling tlâng ve deuh tawh a, Krismasa thil thar neih kher tumna rilru kha kan paih ve tawh a, kan te ber Mercy erawh chu a la huam ve lo, ka nuin kawr leh pheikhawk a leisak a, a hlimin a lãwm thiam khawp mai.

Sângpuiite pawh Krismas hmang tùrin an rawn haw ve a, a rai ni khân an sawi sia, a dul lah chu a thêp then bawk si a, ka hre thiam lo khawp mai. Dâwt thu leh bawk an vawrh darh a ni ngei ang chu, thu dik nge dâwt tih pawh chian hmasa lova an han sawi darh țhìn hi chu a huatawm ve ngawt mai.

Mâma pawh tunah chuan a tlangvâl ve tak tak tawh a, a țawng tam lovin a hmaa thil sawi bawrh bawrh leh mi chanchin pawh sawi ve mai thei țhin kha a ni si a, mak ka tiin ka zâwt hial nghe nghe a, ani chuan," Tunah chuan ka puitling tak tak tawh a, ka nu min zilh vàng nge ni, mi chanchin țha lo lai sawi leh dâwt nge thu dik tih pawh hriat chian loh sawi hi chu ka sim tawh a ni," a ti ve mai bawk a, a ti ţha ka ti khawp mai, chutih rualin ka nu ka fak bawk.

Kan khuaah kan awm tam si lo va tiin Krismas vuakvêtah chuan Mâma nèn chuan Biak in lamah kan awm tam deuh a, Biak in chei ilo leh tih fai vêlah pawh kan thawk ziah bawk.

Kan kohhran țhalai zîngah min han be țha ve deuh leh a rûka min beisei ve deuhtu pawh ka tawng ve ta hial a; mahse, ka chhâng lêm lo, tunah tak phei hi chuan ngaihzâwng neih loh tawp hi ka duh chu a ni mai. Ka phû loh hlîr an ni a, kei aia țha an hmu vek ngei ang.

Zànah a tàwp nân tak tak biak in kan chei leh a, a mawi tawh khawp mai. Kârleh Nilaini mai khi Krismas a ni tawh bawk a, kan chei rei mah mah zâwk a ni; mahse, Upa Zatâwna thil phal zâr kan zo vàng a nia, a ma pawisain biak in cheina a rawn lei belh si a, kan chei fel vek deuhthaw tawh a nia, kan han tinawn leh a ni.

In ka thlen hma chuan ka pute in piaha car lo ding chu ka hmu zawk a, ka phu deuh zawk zui. A rawn kal lehpek tihna em ni? A va țûl lo thei tak! Ka thin erawh a phu dup dup a, amah hmuh châkna leh phùrnain min tuam hlawp hlawp a, ka thâwkte hial a tibuai deuhin ka hria!

Pâwnah ka ding vang vang phawt a, chumi hnuah inah chuan ka lût ve chauh a, a lo kal tak tak a nih hi, ka nu nèn chuan inhma tawnin an lo țhu a, an hmel lah chu a thutak dùn êm êm zui a.

"Eng nge i lo tih?" ka ti ringawt. " I lo kal a ni maw? I dam em? Eng thil nge thleng ta? Thil thleng a awm em ni?" ti tea biak àwm tak, ka nu bulah lenghâl, ka inthlahrung ru tawp.

"I rawn lêt duh si lo va, ka lo kal ta mai."

Rei kan inbe hman lo, a chhuak deuh thuai a, ka nu nèn an inbiak avàng chuan kei chu ka lo ngawi reng ringawt. Car-a a tlàn chhuah hnu chuan ka nu chuan," A tum ve hle mai maw," a ti sap a, kei chuan," Tikhân, khawnge a kal dâwn?" tiin ka han zâwt a, ani chuan," Khawiah vak nge a kal ang? A haw dâwn a nih kha," a lo ti mai a, mit khap hauh lo chuan ka nu chu ka en a, ani chuan," A hmaa a lo kal pawhin a haw daih tho kha," a ti leh a.

"Mahse, tunah te chuan thlasik a nih bâkah a tlai tawh alawm," ka ti ve thung a, ka nu lah chuan," Chutianga i ngaihtuah te chuan riak tùrin i sâwm mai lo a nih kha," a lo ti leh a, ka chhâng zui tawh lo nain ka ngaihtuah chhunzawm deuh reng a, khua a vâwt tawh si a, riak tùra sâwmna thu han chhâk chhuak zeuh ila chuan a riak ve mai ang em tih te chu ka ngaihtuah kual mai mai a.

A tûka tûkțhuan kan kïl lai chuan Zotei chuan," Nu, nizàn khân U Kob-a khân eng nge a lo tih a?" tiin nizàn chungchâng chu a rawn sawi chhuak a, Mâma chuan," A lo kal maw?!!" a lo ti vat a, ani chuan," Kal e, kan inbe zawk a; mahse, vawiina kan ei tùr cake kha siam a ngai sia, ka haw hman chiah lo va," a ti leh a, ka nu lam chu enin," Eng maw a rawn tih a?" a ti leh a.

"I u tân amah a rawn inpalai a nih ber kha."

Ka chaw țhial lai chàwl meuhin ka nu chu ka en a, ka mit pawh ka khap lo. Mâma leh Zotei chuan," Eng maw?!!" an ti rual țhawt a, ka nu chuan," I u tân a rawn inpalai tawp a nih kha, neih atân min rawn dîl a," a ti leh a, ãwih lo zet chuan ka nu chu ka la en reng a, eng thil nge ni a sawi hi?!! Neih atân maw?!!

"Yessss ...!!" Zotei chuan a ti râih a, "Nu, eng thil nge i sawi tâk hi?!!" ka ti ve thung a, ani chuan," Ka sawi tawh kha, a pà rem rem viau mai, khatiang kha ka hriat vawi khatna a ni hial ang chu! Thil awmzia ka hrilh fiah a, zaninah emaw nakzànah emaw pângngai takin palai hmêl kan hmuh ka ring," a ti ta duah a.

Palai. Palai hmêl chungchâng a ni a sawi ni.

*MAHNI INRINTÂWKNA HI AMAHIN A LO AWM NGAWT LO, DÂRKÂR, NÎ, CHAWLHKÂR LEH KUM TAM TAK RIM TAKA THAWHNA LEH MAHNI INPËKNA AȚANGA LO CHHUAK A NI*