☆LAIRIL LUAHTU☆ - 2 By Dingdi Pachuau

 ☆LAIRIL LUAHTU☆ - 2 By Dingdi Pachuau

Khuain țhat lam pan a hnêkin a sûr char char mai, fùr lai ngang a ni a, a hunpui lai a ni ve tlat bawk si a ni.

Sir Manuna lah kawnga kan kal laiin a lo tlán ve thei bawk si a, han hnial ve țhìn mah ila kan chuang ta zauh zauh mai. Kan chuan apiangin a motor kan chuan hmasak ber nia lo chuang vepa kha a lo chuang tel ziah bawk, school kan thlenin a chhuk ve ngai bawk si lo a, ka hre thiam lo khawp mai.

"Kan chuanpuipa kha a chhuk ka hmu ngai si lo va, kan school-a kal hi a ni ve lo em ni le?" tiin Mami chu ka zâwt ta nge nge a.

"I star deuh a ni maw?" a lo ti vat a.

"Teuh lo mai! A lo chuang tel ve ziah sia, kan section-a mi ni lo mah se eng section emaw ber chu a ni ve ngei ang a, a nih loh tal pawhin department dang pawh a ni maithei tho bawk a," ka ti duah a.

"Ka lo en chiang ngai miah lo, bâkah, a laiah i țhu ziah a, a hmel i hre chiang deuh zâwk ang chu?" a tih chuan," Aih, ka en chiang ngai lo,   a nèlawm loh hmel lutuk a, deh pawh ka dek ngai hleinem," ka lo ti a.

"A ni maw?!" tia nuihza tih hriat taka min rawn en chuan,"Ni ang chu, 

ka țang țùng ziah alawm," ka lo tivat a, zâ tih hriat tak hian a nui chhuak ta hawk hawk a.

Zirtàwpni a ni a, Sir Manuna motor-a chuan kan duh tawh loh avàngin, a lo tlân kan hmuh veleh dàwrah kan péng ta daih a, ani pawh chuan min hmu lo a niang, a tlân tlang ta daih a.

"Nuam ti lo deuha chuan ai chuan hnawm deuh hlek chung pawhin class kan kal poh a niang chu," nui chung hian a ti a.

"A pawi miah lo! Sir Manuna hi chu a fel reng; mahse..." tiin ka sawi zawm duh lo va.

School kan thlen hma deuh chuan Sie Manua motor ngei mai chu a rawn tlân lêt leh a, Mami nèn chuan hriat thiam loh hmel deuh hian kan inen a.

"Engtizia nge maw ni le?" ti sapin motor lo tlân tùr chu kawng kan lo kian a, kan bul a rawn thlen chuan tlân muang chuang lovin a tlân tlang daih!

"Sir Manuna a ni miah lo!" tiin a hawi lêt hâ hâ a.

"Kha pa kha, kan chuanpuipa țhìn kha a nih kha, a hmel ațang khân ka hria. School naupang a lo ni lo tawp mai!" ka lo ti ve thung a.

"A chhe miah lo!" a ti leh a.

"Nia, a lo chhe vak lo a nih dàwn kha; mahse, a aw a mawi loh vaih chuan a chhia ka ti daih ang," ka lo ti ve a.

Kan pahniha chhe lo kan tih kan sawi ve vawi khatna a ni hial ang chu!

Kan test-na result a chhuak tawh a, Helen-i'n mark a hmu sâng ber a, a dawtah Rci. Kan tluk hlei thei lo chu a ni, keini pawh Mami nèn kan mark hmuh a inzât chiah a, kan rin aia kan hmuh tam avàngin kan lung a awi ve tho.

Chhùn chawlh laiin picnic hun tùr chu kan sawiho leh malh malh a.

"Duhthusàmah chuan Inrinni ni lo thei se ka ti ngawt mai, kâr tluanin school kan kal a, Inrinni hi chuan in tihfel leh thil țûl tihah chhûngte puih an ngai ve țhìn sia," Ahmai  chuan a lo ticharh charh a.

Dik ve reng mai.

"Mahse, hun kan nei hleinem, picnic duh vànga school chawlh ringawt lah a tihchi miah si loh," Melorie chuan a lo ti ve thung a.

"Sawrkâr chawlh a awm hnai êm le aw?" Lbi chuan a ti vang vang a.

"Awm lo, Zirtîrtute Ni leh Pu Gandhi-a birthday a ni mai," Tetei chuan a lo ti vat a.

"Ka hre chhuak a nia!" Rci chuan a rawn ti chhuak ta phut a.

"Eng?" kan lo ti rual țhawt hlawm a.

"Ni 15 Thawhlehni khian Sir Opa leh Miss Puii an inneih dâwn kha, fuh dâwn lutuk!" a rawn ti chhuak ta a.

Ni dâwn tak e. Kan zirtîrtute ve ve an ni a, school kan chàwl ngei ang, zirtîrtu zawng zawng an kal vek àwm si a.

"Fuh lutuk! Kan lo inbuatsaih lâwk deuh a ngai tawh a nih chu, naktûkah thla a ral dâwn a, pawisa pawh kan thawh khâwm vat loh chuan thil lei tùr neuh neuh a awm ang a, kan mamawh thuai dáwn," Helen-i chuan a lo ti vat a. 

"Nia, kârlehah chuan keng vek thei ila, bazâr tùr pawh kan inruat láwk ang a. Chuan,  tuin nge pawisa chu khawn ang?" Mami chuan a lo ti ve a.

"Maria-i hnênah pe khâwm ang u, ani hi a ngawi reng a, a ţawng tam phah ve deuh mahna!" Helen-i chuan a rawn ti kher pek a.

"A, kei chu a tihchi loh, Lbi hian a hui kháwm thiam deuh ang, bâkah, an awmna pawh a laili ber a," ka lo ti a.

"Ho lutuk! Pawisa chu i hnênah kan pe khâwm ang a, bazâr tùr erawh kan ruat hran leh dáwn nia," Lbi chuan a lo ti a.

Zàna lehkha ka zir pah chuan kan picnic hun tùr chu ka suangtuah a, a hmun tùr la sawi chiang lo mah ila a nuam leh viau ang tih ka hre sa a ni. Ei leh in lam kan hnianghnâr thei viau zêl a, Lbi hian a pa a be thiam thei țhìn bawk a, kal lam leh haw lam hi an motor-in min hruai ve ziah. An hausa a, a pa hian a fanu duat tân hian ui a nei ngai lo, a fanu țhiante pawh hi min duat vek maiin ka hria. Nikum ațang chauha inhria ni hlawm mah ila kan class hmeichheho hi chu kan inkàwm ngeih êm êm tho. Lbite hi chu an dàwr lian pui vàng hian an lâr ve bawk a, ka nu leh pa pawhin a pa hi chu an hre ve lutuk, an hausa a, an thilphal viau bawk. Mi rethei hnênah thilpêk an pe nasain fahrah chàwmna hmun, addict center leh a mamawh tân an luang chhuak nasa êm a, malsàwmna dawng tùr hi chu an ni chiang a ni.

Ka lehkha zir hrechang lo lék chuan ka lo ngaihtuah veng veng mai a, ka inngaihtuah harh ta thut a, lu thing nak nakin tui bottle chu ka han ban a, tui a lo awm tawh awzawng lo, a lo zãng dârh mai.

Thovin fridge bula filter kan dahna lam chu ka pan nghâl a, ka pate pawh inlêng an lo nei a ni chiang, an lo țawng làng láng a.

"Bawihte, thingpui no hi lo seng nghâl lawk mai teh," ka pain a tih chuan sitting room lamah chuan ka phei nghâl a.

"Hei hi i fanu maw? Fanu nula i lo nei dêr tawh a nih hi," tiin kan inlêng chuan a ti a.

Ka en lêm lo, thingpui no chu ka seng tawp a, ka kal leh nghâl daih.

"Nih ve kha, a lian uaih tawh nain a la naupang chhia khawp a, mi biak nachâng pawh hi a hre ngai lo, room lamah hian a inkhung chawt a," ka pain a tih ri pawh chu ka hre reng.

Nia, inlêng hi ka chhàwn ngai lo, ka pain zu a in deuh hnuah phei hi chuan chaw eina hmun ka tihfel veleh room lam ka pan vat țhìn, lehkha zir reng lo mah ila zu in bulah ka awm peih lo.

*******

Dam tlat chuan hun a kal ve nek nek a, kan picnic hun pawh a rawn inher chhuak ve ta. Mami'n min rawn sàwm meuh chuan ka pa pawh a chhuak hman daih tawh a, ka nu ka dîl lâwk vek tawh bawk a, rilru thawveng takin ka kal thei ang.

Lbite in lamah kan kal a, țhiante pawh an lo awm kim deuh vek tawh. Véng hla ber Ahmai pawh a lo thleng tawh niin, keimahni kan tlai lek lek zâwk a lo ni.

Kan zavaiin mi 25 lai kan nih avàngin Lbi pa chuan rem a lo ruat lâwk diam a, an bus thar chu thawhin, driver bâkah chhawr pakhat an neih hnênah chuan kan  picnic-naa kan ei tùr min siamsak tùrin a ti zui zat a, chutah," In indaih lo palh ang e," tiin chêng sâng hnih min pék belh zui bawk a, kan lâwm leh kan hlim hmél chu hmuh nuam a ti ve ngawtin ka ring.

Pawisa kan neih belh leh tâkah chuan ei tùr eng eng emaw kan lei belh leh rih a, hlim vànga nui leh țawng hlutin kan picnic-na tùr hmun lam pan chuan kan tlân ta vang vang a. 

Ka kal ngai lohna lam kawng a nih vàngin ka bo angreng khawp mai a; mahse, Aizawl ațangin a hla lutuk lo a ni ang chu, ka rin aia hmain kan thleng a.

Bus a din chuan ka han hawi kual a, kan țhutna lo lam sîrah gate lian pui a lo awm reng niin, chhuk tùr chuan kan che ta sap sap a.

Helai hmun pawh hi Lbi sawi chhuah a nia, mi dang chu kan la kal ve hlawm lo a niang, an au țèng țúng hlawm a.

"A va nuam dâwn ve! A hmun a biru reuh sia, a hla vak mang si lo!" Melorie chuan a ti ham ham a.

Gate chu putar lam deuh tawh hian a rawn hawng a, kan ei tùrte keng báwr țûn chung chuan ka hawi kual nasa mai a, ko bang sâng tak tan tlang tawpah kan kal ni berin ka hria. Kawng chu a țha hle a, blacktop vek a ni, kawng sîr tawn tawnah chuan thing buk leh pangpâr mawi tak tak, awmze nei zeta phun a awm zui a, ngun taka enkawl an ni tih a hriat hliah hliah.

Kawng zâwlah minute 5 vêl kan kal a, tlémin a lo chhuk ta deuh a, kan kalna tùr chu a hmuh theih ta ruak mai, kal hmasate phei chu an râk nasa tawh mai.

A hmun hi duhthusàma remchâng leh nuam a nih hi le. Hawi a nuam a, boruak lah vawng dai tùrin thing a tam bawk si, pangpâr nalh tak tak, ka la hmuh ngai lêm loh hmuh tùr a awm țeuh a, enkawl ngun an ni tih a hriat viau bawk. He picnic spot neitute hian pawisa chu an sêng nasa ve ngawt ang chu, kawng chungchâng chu thuhran, thing buk awmho pawh hi hmun dangah ka la hmu ngai lo, Tv lamah chuan ka hmu ve fo tawh, mawi ka tih chi an ni vek mai.

Kan innghahna tùr in chu kan pan ta nghâl a, a chung chu dî vek a lo ni a, a bangah erawh chuan thingphel an hmang thung. He in saknaah pawh hian pawisa chu an sêng ve hlek ngei ang, a zau nuamin a chhûngah engkim a awm ve thlap mai si a. Fridge, TV lian zet, carrom board leh țhutthlengsei pathum a awm ve khap a, hawi phei leh deuh hlek ila, choka a hmuh theih nghâl a,  a zau fahran lo nain a felfai reuh khap bawk.

Tukverh an hawng zung zung a, boruak pawh a nuam raih raih khawp mai. Tukverhah hawi chhuak ila, kan thlang deuh chiahah chuan swimming pool pâwl ruih, zau zet a hmuh theih nghâl a, a bul vêlah plant mawi tak tak leh a pâr lam chi pawh hmuh tùr a awm leh a, a hahdamthlâk ngawih ngawih ka ti.

"Tui chèn ka châk tawh ber mai!" Helen-i chuan a ti a.

"Kei pawh," Maruati chuan a lo ti var a.

"Zu chêng r'u, eirawng bâwl tùr ka lo pui ang," ka lo ti a.

"Nia, tui chèn châk zualpuiho kha, zuk chêng r'u, nakinah kan lo chêng ve ang," Ahmai chuan a lo ti ve a.

Eirawng bâwl tur ka ni miah lo a; mahse, tui chèn chu ka châk lutuk hran lo, nakinah chuan ka chêng ve mahna!

Aveni chuan,"Nia, kan mipate kan lo pui ang," tiin choka lam chu a pan phei ta nghâl a.

"Ka chêng ve dâwn asin," Mami'n a tih chuan," Zu chêng rawh, i chãk tawh viau kha," nui chung hian ka ti a

Chèn tumho chu an tlán thla ta sap sap a, mi 6 vêlin mipa pahnih chu kan pui dâwn a ni.

"In chêng châk ve em? Puih kan ngai hran lo asin, in duh phawt chuan zuk chêng ve r'u," kan motor khalhtu U Zama chuan a ti a.

"A hmanhmawhthlâk loh," ka lo ti a.

"Nia, a hmanhmawhthlâk loh, nilêng hun kan nei alawm," Thangi chuan a lo ti ve a.

Mipain sa an khawih a, a țhenin an pui a, kei leh Aveni'n bai tùr kan lo buaipui thung a.

A hmanhmawhthlâk hran lo bawk a, kan hmanhmawh lo. Chutih lai chuan thlanglamah chuan music ring tak a rawn ri chhuak a, Aveni chuan," Hruaii a ni ngei ang, bluetooth player kha a keng a nih chiah chu," a ti a.

"In țhiante chu an va hot ve a!" nui sûng chung chuan U Zama chuan a ti a.

Thangi chuan," Lalhruaii a nih chu, a lâm leh nasa dáwn lutuk," nui chung vêk hian a rawn ti a.

An bengchheng khawp mai. A țhenin thlêr zet zetin zai an zàwm a, a țhen an au teng tung bawk a, ngaihtuah dang an neih loh hmel kher mai.

A țûl zualpui kan buaipui zawh hnu chuan tui chêngho lam chu kan thlîr thla a, a țhenin tui an chêng a, a țhen an lâm a, a țhen lah an lo inûm kawi zawr zawr bawk a.

"Lalhruaii kha, han lâm leh teh se, kan hmu châk," tiin Thangi chuan a zu au a.

"In hman tawh chuan lo chhuk ve r'u," Tetei chuan a rawn ti lang lang a.

"Zu chhuk ve r'u, kan tih dan tùr kan hre vek tawh a, kan hriat thiam loh tâk leh kan rawn zâwt mai ang che u," U Duhzuala chuan a ti a.

"Kei chu ka peih meuh rih lo, chu ai chuan helai hmun hi fan kual deuh ka châk záwk a," ka ti a.

"Nia, nakin lawkah thil ei tùrin kal kháwm a ngai leh tho ang a, kei pawh ka peih tingtang lo mai, ka lo pui ang che u," Thangi chuan a lo ti ve a.

"Puih kan ngai tawh lo ang, kha, corrom board kha in pen ngai em? Lo inpen rawh u, kan hman hunah kan lo pen ve ang," mipate chuan an ti leh a.

Kei erawh chu in ațang chuan ka chhuak a, kan chhak lam deuh si, sîr lam deuh si-ah chuan ka kal kual a. Tui chêngho boruak pawh duhthusàma ring a la ni, an inman bet a ni ngei ang, an khêk rawi rawi mai.

Thing awmna chinah chuan ka han lût thûk deuh a, boruak dai raih leh țhiante thâwm pawh hriat theih mang lohna hmun chu nuam ka ti kher mai. Helai velah hian sava pawh a lo la awm nual a ni ngei ang, an hrâm nak nak ka hre tlat.

Lung chungah chuan ka țhu deuh vang vang a, ka dinglam sîr chu âwihtlán deuh niin hnim pawh a țo mang lo a, hawi vêl a nuam ka ti, hetiang hmun hi ka hmu khãtin ka kal khãt êm mai.

Pangpâr mawi deuh ka hmuh chu thliah tumin ka han ban dà dá a, ka ban phâk mai loh avàng chuan tlêmin ka han fân leh deuh a, ka vawnchhan thing chu a tliak ta rawp mai, ka țhu hnawk a, âwihtlân deuhah chuan ka tawlhthla ta hawn hawn mai.

Ka tawlh thui lo hlauh, thing lian vak lo hian min lo dang a, tlêma tlêmah ka lum thui țêp a ni, ka thlang lam chu a la thuiin a la âwih ve viau lehnghâl a.

Ka Kekawr hâk chu ka khûp thlenga a inlip chhoh avàngin ka chàwn leh khûp chu a pilh nasa mai, a thi deuh sar sar nghâl mai rêng a. Chubâkah, ka bân leh ka hnungzãng chu eng thilin nge min seh ni, a thîp sup sup mai.

Ka bân chu ka en vat a, eng thil mah ka hmu lo; mahse, a thîp na țhuam țhuam thung a.

"I chesual a ni maw? I nâ em?"

Ka phu nasa lutuk ringawt!

Hlauthâwng zet hian aw lo chhuahna lam chu ka hawi vat a, gate min lo hawnsaktu putar kha a ni tih ka hriat chuan tlêmin ka hlauthâwng ta lo deuh a.

"Ka thing vawn a tliak a, ka lum deuh a," ka ti ta ringawt a.

Min rawn pan hnaiin," E, kha, i khûp leh i chàwn kha a thï a nih kha, lo kal rawh, inah damdawi kan hnawih dâwn nia," a rawn ti a.

"A na lo; mahse, ka hnung leh ka bân hi engin emaw min seh niin ka hria a, a na țhuam țhuam mai a, min sehtu lah chu ka hmu mang bawk si lo va," ka lo ti thung a.

"Kàngțhaiin a kàng che a ni ngei ang," a tih chuan makti deuh hian ka en ringawt a, chutiang chu ka la hre ngai si lo va.

"Ka pu, chu chu eng nge? A hlauhawm em?" ka ti vat a.

"Hlauhawm lo ve, hnim chi khat a nia, a hnah hi a thap lutuk a, hlîng hlîrin a khat niin  an sawi țhìn. Chu chuan i taksa némah khân a deh hlauh chuan a kàng tihna a nia, a na țhuam țhuam țhìn a ni," a ti leh charh charh a.

Chutah,"I ding thei ang em?" a tih zawm zat a, kei pawh chu awlsam zet hian ka ding ve mai bawk a, ka khûp chu a thïp țan vât vât mai.

"I kal theih chuan min lo zui la," tiin a inher a, a kal țan ta nghâl a, kei pawhin ka zui ve ta vat a, zah lamah pawh ka la lêm lo.

Țhiante thâwm chu ka hre leh ta vau vau mai; mahse, kan innghahna lam kha chu kan pan lo, min hruaina lamah chuan ka zui ve zêl tawp mai.

Kan hmaa in pakhat, a chhâwnga sak ka hmuh chuan mak ka ti kher mai, chulam chu kan la pan zêl zui.

"Ka pu, saw saw in in em ni?" ka tih chuan a bu nghat a. Țawng lo chuan kan kal  phei zêl a, kawngkapui ber a lo inhawn huau avàng chuan awm an awm a nih ka ring nghâl ringawt a.

In chhûng kan luh chuan,"Lo țhu rawh, ka'n la ang e," tiin room lamah min luhsan ta nghâl a.

In chhûng chu ka hawi kual a, in pângngai tak a ni. A zau lutuk lo nain a fel fai reuh a, bungrua pawh a pângngai khawp mai. Chènpui mi dang a nei tihna a ni ngei ang a, a chènpui chu a che fel phian a nih àwm hi.

Room ațanga a rawn chhuah chuan lapua leh damdawi hnawih tur chu a rawn keng chhuak a.

"Bawiha, lo chhuk lawk teh," tiin a au nghâl zat bawk a.

Ka țhutna bulah chuan dawhkàn té rawn hûngin a chungah chuan lapua leh damdawi chu a dah a.

"Ka kut hi a khùr deuh hlek tawh a, Bawiha'n a hnawihsak dâwn che nia," a ti leh a.

"A ngai lo, ka hnawih thei alawm," tiin lapua chu ka ban nghâl a. Ka hnawih ve thei alawm, mi dang min hnawihsak kher a ngai lo, a zahthlâk êm mai a.

"Hnawih ringawt suh, hrükfai hmasak phawt a ngai ang."

Ka en nghâl dâwrh lo thei lo, a aw chu, mawi ka tih chi ni miau hek le. 

Hei hi maw ka puin 'Bawiha' a tih chu.

*NANGMAH HAWTUTE CHU AN DUH DUH SAWITÎR MAI LA; MAHSE, AN HUATNA CHE LEH AN THIL SAWI AVÀNGIN I THIL TUM CHU ȚHULH PHAH DUH CHUANG SUH*