☆UNEXPECTEDLY YOU☆ - 32 By Dingdi Pachuau

 ☆UNEXPECTEDLY YOU☆ - 32 By Dingdi Pachuau

Ka chhâng lêm lo, chhàn chi lah a ni hek lo. Ka tihnatzia leh ka chunga a thinrimzia ka hria, mipa a ni a, a hmeichhia zâwkin ka kalsan kha tlâwm a inti ngawih ngawih a, chuvàng chuan hetiang thil hi a sawi chhuak a ni tih ka hria, a rilru nâ hi chu thuhran, a taksaah harsatna a thleng leh zui a, hei vàng hian, sawi chhuak lo mah se a theih ang angin ka chungah chêt lâk a tum pawh a ni thei, phubâ a la a nih chuan amah a intichhe vek ang, kan inkâr boruak pawh, chu thil chu thlen ka remti thei ngai lo ang. A duh phawt chuan min diriamin na tak tak pawhin min țawng khum rawh se, a duh tâwkin țawngkam chhe tinrêngin min puh bawk rawh se, ka tuar vek thei ang, a chunga ka thil tih vàng khân ka tuar vek thei ang; mahse, phuba lâk a tumna lama amah a intichhe tùr erawh ka duh lo, inkawp thar leh tih lam phei chu... ngaihtuah pawh ka duh lo.

Min rawn biak loh chuan biak ka tum lêm lo va, a chanchin erawh Sêntei hnên ațangin ka hre zauh zauh tho, lo ngaihven tùr khân ka chah ve miau bawk a, min rawn hrilh rêng a ni. A inzaina pawh a zia chho zêl tih ka hria a, ka lawmpui viau a ni, dam se, hrisêl se, hlim deuhin awm se tih hi a tâna ka duh ber chu a ni mai. 

Sêntei chuan min rawn fiam a," I ngaihtuah viau a nih chuan phone ve tho țhìn la, i ngaihsak a ni tih a hre chiang deuh deuh ang a, in inkâr pawh a țha leh thei ang a," a rawn ti a, za lo deuhin ka nui ringawt a. Chhanzuala min rawn biak dàn chu ka hrilh dâwn em maw ni ka ti deuh ut ut a; mahse, thil thleng ngai lo tùr a nih avàngin ka hrilh duh ta lo. Heti lam hawia mi fiam zuk hi a chîng a, ka duh lêm lo, Chhanzuala tân chuan amah phatsantu hmeichhia kha ka ni tawh a, na tak tuar tùra kalsana phatsantu lamah a thinlung hi a hawng leh tawh ngai lo ang tih chu ka ngaihtuah pha ve alawm, kei lah  tu mipa lamah mah thinlung pe thei ka ni tawh hek lo, fapa enkawl tùr ka nei a, chutiangin ka fapa pi leh pute pawh. Ka hmangaih ber ka kalsan tawh a, ka thinlungin uiresan lo mah se ka taksa chuan a phatsan tlat si a, amah chauh ka hmangaihna hian pàr a chhuang thei tawh lo va, ka thlàn thlengin he ka thinlunga hmangaihna hi liampui mai ka thlang zâwk ang.

Inrinniah Rosangate chhûngkua nèn an huana kal pahin luiah kan kal mai mai a, 'naupangin nuam an ti dâwn êm mai' tiin Rosanga'n a rawt pek a, kei tak pawh hian ka châk asin, thingtlânga awm nawmna pawh a ni ngei ang chu. Kan lui kalna lah chu a lo nuam phian mai a, a luikam chu zâwl tak ni lêm lo mah se a boruakin a zir hrim hrim a, tui pawh a tam vak lo va, naupang tân a tâwk chiah a ni. 

Engmawia leh Bawihtea chuan nuam hi an han ti khawp mai a, an țê chèl chûl a, tui an han rap a, an rap per chhek chhek a, an nui uar uar bawk a, an boruak chu a nuam êm mai a, thla ka lâksak nasa khawp mai, chu mai chu duh tâwk lovin video pawhin ka lâksak nual bawk a, nakina en lêtah ka duh a ni. Bâkah, chhûngte pawhin an hmu duh ve ngei bawk ang a, an làwm dâwn ém asin.

An thlâmah chhùnchaw kan fâk a, chawhmehah Maian châng chawr leh Rumpum kan chhum pawlh a, in ațangin Alu kan pãiin hmarcha leh zo-purùn hnah ràwt pawlh kan keng tel bawk a, duh aiin chaw ka ei hnem, ka ei tui bawk si a, kan kham hnuah ka dul ka zût ka zût mai.

Haw lamah erawh kawng a chho ve deuh a, muangchângin kan kal a, Bawihtea chuan puak a duh si lo va, Engmawia nèn chuan kal dùnin a chângin an ding a, an din chuan keini puitling lam pawh kan ding ve zêl mai a, kan kal rei khawp mai; mahse, pawi kan ti lo, puak ngai miah lovin in thleng chu kein an kal tluan ve parh mai a ni. 

In kan thlen hnu chuan a chàu ve viau a ni ngei mai, thil ka dah fel vêl laiin țhutthlèngah a lo muhìl bâm mai a. A tìrah chuan ka hre lawk lo va, motor khàl khân a ri ve rak rak reng si a, ka lo ngaihtuah vak lo va; mahse, a hnu deuha a thãwm a reh tâkah chuan ka han hawi kual a, a motor chelh reng chunga a lo muhìl bâm mai ka hmuh chuan ka pan hnai nghâl a, khawngaih takin ka en ngawih ngawih mai a ni. A pa tel hauh lova ka enkawl chhoh ve a ni a, ani tê hi ka innghahna chu a ni mai, no tùrin ka duh lo va, duat hliau hliau pawh ka tum chuang lo, he khawvêl nunrãwng takah hian theihtáwp chhuaha hmangaih taka enkawl chhoh erawh ka tum thung. A muhìl hmêl chu ka en reng a, a thaw sék sêk a, a mu tui tih chu a hriat theih reng bawk a, a chau ve ngang a ni, khuma sawn pawh ka duh viau nain ka pawm sawn phal ta lo, mut erawh ka mut țhattír thung a. 

Bawihtea thlalâk chu ka status-ah ka han hmang a, video tãwi tê nèn, eirawng ka bàwl laiin U Kimi'n min rawn bia a," Bawihtea chuan nuam a va han ti êm êm ve a! A hmuhnawm ka ti tawp," a rawn ti a, kei pawh chuan," Ti tak a ni, kan haw kawngah pawh puak a duh lo va, kein in a kal thleng țhak asin," tiin ka chhâng ve a, Bawihtea muhìl lam chu ka melh pah zauh a.

"A khawngaihthlâk reuh e a! A chàu ngawt ang chu," a rawn tih leh chuan," Aw, chàu ve ngang a niang, țhutthlèngah a muhìl bâm mai, tunah pawh a la muhìl reng," ka ti leh a, ani lah chuan,"Awii, ka va khawngaih reuh tak êm! I tikhawngaihthlâk êm mai, a duh lo chung pawhin puak luih mai tùr a nia. A ke a kham ngawt ang, a rawl vek dâwn a nih chu, a lo harh hunah tuilum, lum deuh takin bual ang che aw," a rawn ti sauh sauh a, keimah tluk zeta hmangaiha ngaihsaktu a ni ve a, ani phei chu kei aiin a upa tawh zâwk lehnghâl a, a rilru tùr pawh ka hre thiam ve viau mai.

Chhanzuala pawhin a lo en ve ngei a ni ang, zànah min rawn bia a," Fapa hi chu i nei êm êm bîk teh e!" a rawn ti deuh kher pek a, kei chuan," Ka nei miau sia," tiin ka chhâng mai a, ani chuan," Mite pawhin an nei ve tho," a rawn ti leh a, kei pawh chuan," Nei ve tho e, kei chuan ani chauh hi ka neihchhun a ni alawm," ka ti leh a, a run deuh a niang," Ka pen châk e a!" a rawn ti ta nghut a, ka hre sual emaw ka ti hial mai, ka ngei lutuk a, țawng pawh ka țawng duh tawh lo. Ani pawh chu a ngawi ta vung vung a, ngawi kan dawh dùn a ni deuh ber mai; mahse, a hnu deuhah chuan 'Êm a' tiin, a upa zâwk ka nihna tilangin eng nge a an zél tiin ka han zâwt khawmawi ve a.

"Min ngaihsaka i hre duh tak tak a nih chuan min rawn be ve ta che," a ti leh nghut a, a hmet tàwp zui ta daih a, a awm dàn chuan min tihrilhhai letling khawp mai. A thinrim ti ila a thinrim chhan tùr ka hre si lo, ka biak ngai loh vànga thinrim tùrin a bialnu pawh ka ni tawh lo va, a u emaw a u țhiannu emaw ka nihna anga ka ngaihsak lova a ngai a nih erawh chuan thuhran; mahse, a u țhiannu a mamawh loh thu kha min hrilh bawk si, ka hre thiam teh nuai lo ve a. A, a thiam loh zâwk a ni, engah nge ka fapa pen a châk ringawt mai ni? Ka fapa pen châkna thinlung a nei ringawt mai pawh hi a fuh lo, ani naupang thil tihsual pawh nei ve lo lehnghâl, a ti mah mah a ni.

Khua a rawn vawt chho leh țan a; mahse, tunah hi chuan váwt tuar pawh kan cho tawh, heater kan nei a, tuilum ip kan nei a, mawza lum leh mutpuan lum țha tak nèn, kan cho viau a ni.

Zirtàwpni tlaiah min rawn hrilh lâwk miah lovin ka nu(Zda nu) a rawn thleng hlawl mai a, ka school bângin kan kawta ka han hmu thut mai chuh, mak ka ti a nia aw. Min lo nghahna a rei tawh a nih ka ring, kawtah chuan a lo vei tawn chhên a, ka hmuh veleh chuan mak ka tih êm avàngin biak mai nachâng ka la hre lo zui a, a hnu deuhah chuan," Ka nu?" ka han ti a, a rawn hawi vat a, min hmuh chuan a rawn nui ta sâng a," Ka rawn hrilh lâwk duh lo che a nih hi, rawn surprise che u ka duh ve a," a ti sap a, hawi kualin," Bawihtea ka va hmu lo ve?" a ti leh a.

In chhûnga kan luh hnuah chuan Maduhi ka be nghâl vat a, Bawihtea ina rawn lûtin a pi a hmuh chuan a țê chùl a, tlãnin a pi chu a rawn kuah chat a, an pîtu, hlim hmel taka an inlàwm hmuh chu a nuam tak zet a ni.

A hnu deuhah chuan a lo kal dante chu ka zâwt chiang a, ka pa rem tihna thlapa rawn kal a nih thu leh a rawn kal tùr thu min hrilh miah lo tùra a hrilh thute a sawi luam hnu chuan," Kan in chu a reh àwm mang e, i rawn kalsan daih sia, ka pa pawh a lung a lêng ngawt ang," ka ti a, ani chuan," Lêng ve ang; mahse, kei pawh ka awm rei thei dáwn chuang lo, Pathianni ka rawn hmanpui dáwn che u a ni ber mai. I pa pawh rawn kal ve chu châk viau mah se in lam han kalsan vek chu ngaihtuahawm a ti ve bawk si a, Aisami awm tho mah se ani zawng puitling rilru ang tak tak a la pu pha meuh si lo va," a ti charh charh a.

Ka nu chuan chawhmeh eng eng emaw a rawn keng țeuh a, taxi rawn hmang a ni bawk a, Bawihtea ei tùr pawh a rawn keng ãm khawp mai. Pathianni thleng chauh awm tùr mah ni se, helai meuha min rawn tlawh chhuak ta chu theihtâwpa lo duat ka duh a ni. 

A pi bulah chuan a țawng duh barh barh viau mai a, ka phone-a thla ka lâksakho leh video hrang hrangte chu an en dùn a, a pi lah chuan zawhna zawh dàn a thiam si a, a țawng barh barh reng mai a, kan in chhûng pawh a reh lo ve khawp mai.

Inrinni tlaiah Chhanzuala a rawn lang ve leh hlawl mai bawk a, kawngkaa a rawn lût ka han hmu thut mai ka thin phut nasatzia mai chuh, ka nu leh Bawihteate dàwr kal hlànin a ni hlauh zâwk a, an awm lai ni se chuan ka che chhe viau maithei a ni.

"Eng nge i rawn tih dâwn?" Min rawn biak hnu khân ka be leh tawh miah lo va, tuna a hmel ka han hmu thut hian min tihamhaih ve deuh a ni. Eng nge a an zêl tih zâwt lova a thil lo tih tùr han zawh daih pawh chu a...; mahse a țha vek mai. Bâkah, a cheziaah, na nei àwm angin a awm tawh lo va, a țha vek taah ka ngai a niang.

"Ka rawn kal."

"Chaw i ei leh ang em?"

Min rawn enin," Min va huphurh àwm ve a!" a ti hluk a, kei chuan," Chutiang lam pawh a ni lo," ka lo ti mai a, chaw a ei chuan ka nu nèn an inhmu ngei dâwn a, Bawihtea lahin a nêl hauh si lo, chaw ei lovin haw mai se ti ila chutianga haw leh nghâl vut tùra a rawn kal chu ka ring chiah bawk si lo.

"Oliver-a nèn khân em ni in rawn kal leh a?" tia ka zawh leh chuan," Hre rei hle mai," a lo ti mai a, ka zawhna a chhâng lo tih a inhria ang em? Zawhna ni miah lo hian min chhâng hrât riau. Chutah," Doctor-pa nèn khân in inbe ngai em?" a rawn ti leh a, kei chuan," Tu doctor maw?" ka lo ti ve thung a, ani lah chuan," Tu doctor nge ka sawi chu i hre chiang viau ang chu," a ti leh a, a sawi țha duh miah lo zui.

"Dr. Châma maw?" ka ti leh kher a, chhàn pawh min chhâng lo, chhàn chhunzawm ka tum bîk lo, kan ngawi dùn deuh reng a, a hnu deuhah chuan thingpui a duh leh duh loh lam ka záwt ta daih a, ani lah chuan," In inbe ngai em ka tih chu?" a ti leh sup a. Kei pawh chuan min tih dàn ang chiahin, "Thingpui chu i duh dâwn em?" ka ti nawn ve leh sak a. Chutih lai chuan kawt lamah țawng ri a rawn awm a, Bawihtea leh a pi an ni chiang, an inhmu dáwn ngei e.

Kawngkaa rawn lût pah chuan ka nu chuan," A khawthlèng hi a nuam reuh phian a nih hi, a rem reuh bawk si, nuam ka tih zâwng tak a ni," a rawn ti barh barh a, Chhanzuala a hmuh chuan," Aw, inlêng kan nei a ni maw?" a ti zui zat a, kei chuan," A nuam ve reuh riau asin, a khaw mite lah hi an felin an taima a, an polite riau lehnghâl a, awmhmun benbel nân pawh a tihchi phian maithei a ni," nui deuh chung hian ka lo ti ve a. 

Bawihtea'n Chhanzuala a hmuh chuan a melh hrek hrek a, a rilru a nuam lo ve a niang, ka kutah a rawn chelh vat a, kei pawh chuan nuih sak pah hian nghet takin ka lo hùmsak ve a," Àpi nèn chuan eng thil nge in lei a? Min han hmuh ve teh, min lo lei kêp ve em?" ka ti  sap a.

Chhanzuala chu a awm rei miah lo, kan titi ațangin Zda nu a ni tih a hre chhuak a nih ka ring, thingpui pawh in lovin a chhuak a, ka han ûm zui deuh a; mahse, phone-ah mi a bia a, min rawn ûksàk lêm lo, Oliver-a a bia a ni ngei ang. Haw daih rawh se, pawi lo, sawi fiah tùr a tam lo deuh ang.

An haw daih tak tak a! Tlêm chuan ka khawngaih ve deuh hlek, hmun hla tak ațangin a rawn kal ve vang vang chu a ni si a, dárkár chanve vêl chauh a awm a nia, eng tak ngaihtuah chhunzawm ang maw?

Ka nu chuan Chhanzuala chanchin chu min zâwt ve zauh a, ka zép chuang lo, Lunglei lama kan nau a nih thu ka hrilh chuan," E, a nih tak chu, an tlãn chhuak leh daih sia, an haw dâwn tihna em ni?" a ti leh a, kei chuan," A nih ka ring," ka lo ti mai a.

Chhanzuala chu a reh ta vang vang a, lo kal fuh lo a inti viau a ni ngei ang. A hmaa ka hlauhthàwnna kha tunah chuan nuihza lamah a kal a, ka ngaihtuah chhuah chângin ka nui suk suk zêl mai. Tifuh lo a inti ve ngawtin ka ring, kawng lehlam takah erawh chuan ka thaw huai thung.

Ka nu chu Thawhțanni chawhnu lamah a haw thla leh a, a haw laia awm ka duh avàngin chawhnu first period ka neihna chu mi dang period nèn kan siamrem tawp a, a awlsam khawp mai, rilru hrehawm lovin ka nu haw tùr ka thlah theih phah a, ka thawhpuite chungah pawh ka lâwm tak zet.

Kum tàwp lamah hma deuh takah Dinpuia a rawn haw phei a, ka hmu chêr deuhin ka hria, Aizawla a awm hi a ngeih lutuk lo a nih dáwn hi, tlêmin a thû deuh bawk, hna a thawk nasa ang a, zàn lamah erawh mut a hmu țha lo a ni ngei ang.

Dec ni 16 thleng school kai a ngai a, tlêmin kan haw har deuh dáwn a ni. Dinpuia lah chuan," Kumin chu hetah Krismas hmang ve tawh ula?" a ti deuh reng mai a, ka chhâng vak ngai lo, ka nui liam mai mai. Krismas hi chu chhûngte nèna hman tlàn dial dial hi ka duh ber a, hmun danga hman sawn hi ka duh ngai lo bawk. Loh theih loh thilah erawh chuan duh thlañ theih hek loh le; mahse, vànneihthlãk takin Pathian zârah loh theih loh thil ka chungah a la thleng tlat lo.

"I nu a rawn kal avàngin a hma khân ka tum aia hmain ka haw phah, zanin chu ka rawn kal dáwn a nia, tum aia hmaa ka haw tawh loh hrâm ka beisei," a rawn tih chuan," Thil țûl lo tak a ni, khua a vawt si, i inzaina kha ngaihtuah rawh," ka lo ti ve thung a.

Mahse, ka thil sawi ve hi chu, a ngaipawimawh lo ve si a, a âwih pawh ka ring chuang lo. Zanriah ei kham hnu lawkah Dinpuia a rawn léng a, Bawihtea chuan lo pan vatin toys khalhpuiah a lo sâwm leh vat a, an han khàl dùn a, tlangvál phanchang lam tawh leh naupang kum mi vêlin toys an han khàl dùn hmuh chuan a nuih loh theih loh.

Kawngkhàr a rawn ri a, ka lo chhàwn vat a, Chhanzuala ngei mai chu a rawn pên lût leh ta, ka nui hmel chu a reh riai riai ang chu, țhu tùrin ka ti vat a, a țhu ve mai bawk a, chutih lai chuan Dinpuia chu Bawihtea tih ang ang chuan a awm a, a chângin chhuatah a mu thùl, a chângin a bawk phêk leh bawk a, a hahthlâk a nia.

Chhanzuala chu ka biak loh chuan a ngawi reng a ni mai, ka be zauh zauh a, chu pawh chu a rùl tâwk  chauhin min chhâng, a lungawi loh chhan hi eng ber hi nge ni ang? Dinpuia leh Bawihtea motor khalh chu a en rùn rún reng a, chance nei thei dâwn lovin a inhria ang a, Bawihtea leh Dinpuia chu a ngei a ni ngei ang chu.

Dinpuia hian 'Thil ka hrilh ang che' a tih kha min la hrilh miah lo va, hun remchâng a hmuh loh vàng chu a ni lovin ka hria, min hrilh duh lo rih mai a ni ngei ang. Rin dàn chu ka nei ve tho a, 100% erawh chuan ka chiang lo thung, kei chuan țhian angin ka en mai a, school lamah Pu Head-a fapa a lo ni bawk nèn, min chhaih deuh châng pawh hian ka zak țhin, kei nuthlawi fa chhawm nei lehnghâl hi tu ma duh theih ka ni tawh lo.

Dinpuia chu a haw har lo, a haw hnu lawkah chuan," Kha pa kha ka hnek châk deuh kha a ni tiraw? A ngaizáwng che a ni maw?" a ti nghâl zat a, kei chuan," I ngaihtuahna kha chawlhtîr teh," ka lo ti ve thung a, ani lah chuan," Zanin chu hetah ka riak dâwn a nia," a ti zui leh zat a, a hmel chu ka en vat a, fiamthu hmel ka hmu miah lo.

"Eng vàngin maw? Thil mawi pawh va ni suh," tiin ka lo hnial a, a riak duh tak tak ang tih ka hlau, thingtlâng khua a la ni ve a, miin min sawi luai luai mai dâwn asin.

"Thil mawi lam hi ka ngaihtuah ve lêm lo," a lo tih chuan ," A theih loh, i riak thei lo ang, miin min sawi mai ang," ka ti leh a, ani lah chuan ngaihsak loh hmel zet hian," An duh phawt chuan le, kha pa khân lo hre hmasa ber nghe nghe se a țha ang, a ram lo chin a rawn dâi țan tlat," a la ti zui chheu chheu mai.

*I BEIH HRÂM HRÂM THEIH CHHÛNG CHUAN BEISEINA A LA THÂM RAL LO TIHNA A NI, CHUTIANGA BEI ŢHÌN CHUAN HLAWHTLINNA A HMU ȚHÌN*