☆THE SWEETEST HANDCUFFS☆ - 38 By Dingdi Pachuau

 ☆THE SWEETEST HANDCUFFS☆ - 38 By Dingdi Pachuau

Jakob-a hi a pâwn lam lan dàn, a chezia leh a țawngkam ațanga teh hi chuan mi lèrh ve tak, awm țha duh lo  leh inla ngêng ve tâwk tak, chapo ve lam deuh ti pawhin a sawi theih ang chu; mahse, han belh chian cheuh cheuh hi chuan hêng hi chu kâwra a hman mai niin ka hria, a chhûngril hi a sual hran miah lo. Tunah pawh hian kan han zin dùn a, inkawp ang kan ni bawk a, mipa dang chu ni se min mutpui a tum ngeiin ka ring, thil àwm lo pawh a ni hek lo ang; mahse, min mutpui a tum miah lo, min lo duh tak tak lo a nih te ka ring hial zâwk a ni; mahse, min kuah paha," Hun fâl leh remchâng hmuh veleha bawh zui nghâl ruak ruak chi ni tùrah min ngaih loh ka beisei, hetiang kawngah phei hi chuan fair taka tih ka duh," a tih chuan mak ka ti viau a ni, mak viau hek le. A chunga ka rilru puthmang pawh a danglam nghâl dâwrh rêng a, ka rilru pawh a nuam sawt a ni. Tlangvâl inla eng emaw ve tak nia ka ngaih kha a lo gentleman ru riau mai si a, a rûkin ka ngaisang ta riau mai.

Hotel-ah hian room hranah, room indawt chiahin kan awm a, a tìrah mahni chauha riah chu ka hlauh leh hlauh lohte min zâwt a, ka hlauh loh thu ka hrilh hnuah," A țhat chu, i hlauh deuh pawhin sawi hreh lo la, i bulah ka awm reng dâwn tho a nia," a ti kha a ni a, ka la kal ngai lohna mah ni se ka hlau lêm lo va, mi sual an rawn luh theih ka ring lo bawk a, han hlauhna chhan tùr ka hre lo a ni.

Ka nute pawh chanchin ka hrilh ve zêl a, Krismas hun ngang a ni ve a, he lamah pawh Krismas chu an lo hre ve tho a; mahse, Mizoram lama he hun kan lo dawnsawn dàn leh lawm dàn nèn erawh a inang lo khawp mai thung, Kristian ram a ni lêm lo bawk a, a àwm ka ti viau tho e.

Pawisa lamah chuan ka thlá phãng lêm lo mah se, hman chhuahna tùr ka nei lo khawp mai, amahin engkim tiin pawisa pêk lam pawh a kutah a dah hmiah mai a, khawi ațangin nge pawisa hi a neih ang aw ka ti ru hial a ni; mahse, a sawi dànin school kala a awm reng bâkah college hial pawh a kal chhunzawm chho leh zêl a, ani tân chuan he khawpui hi a mikhual lo viau ngei ang, rei tak a lo tãl hrep tawh bawk a, sum lamah an harsa lo viau tih a lang reng a ni.

An school hmun min fanpui phawt a, building nuam leh ropui zet a lo ni nghe nghe a, a hmun pawh a nuamin compound a nei țha bawk a, han fan vêl pawh a nuam khawp mai. Ka kal vawi khatna a ni a, ka tân chuan khawi lai mai pawh chu hmuhnawm tak a ni zël mai a, mit pawh a tlai khawp mai. An college hlui phei chu nuam tak hi a ni, a hmun a zau si a, thing sâng tak tak leh leh pangpâr mawi tak takte chu hmuhnawm ka tiin boruak an tinuam si a, motor khu bàl hìp tùr a awm bawk si lo nèn, nuam ka ti viau a ni. Thlâte kan la zawr zawr a, college building ropui zet ai chuan a hmunhma chu nuam ka ti zâwk; mahse, nuam ti viau mah ila kein kan kal nasa deuh a, ka ke a kham ngut ngut mai, nimin lamah lah ke hlîrin kan kal tawh bawk a.

"I ke a kham tawh ngawt ang, he tah hian chàwl rih ang aw," a tih pawh chuan hnial lovin thing buk hnuaia țhutna an siamah chuan ka țhu ta vat a, ka bulah chuan rawn țhu ve nghâlin a bag ah aţang chuan tui bottle a rawn phawrh a, min pe a, la vatin ka in nghâl khalh khalh a.

"I ril a țâm tawh em?"

Ka ril tak chu a țâm pawhin ka hre lo. Kan țhut chawlh vang vang lai chuan," Thil pêk tùr che ka nei a," a han ti leh a, kei chuan," Eng nge ni ta? Ka ril chu a la țâm vak lo aw," ka lo ti a, mitko sàn ãk hian ka en phei a, ani chuan a jacket iptê ațang chuan eng emaw hi a rawn phawrh chhuak thung a, ka lo en reng a, velvet box lian vak lo hi a lo ni a, a han hawn chuan silver zungbun ni ngei tùr pahnih, design inang chiah chiah hi a lo awm a.

"Eng nge ang i tih?" a tih chuan ngun tak hian ka en phawt a," La chhuakin ka en thei ang em?" ka han tih chuan," Teh rêng mai, i tâ tùr alawm," a lo ti sup a, pakhat chu la chhuakin ka han thlêk kual a, a mawi reuh kher mai. A pure țha viau a nih ka ring, a rit nalh mai a, bâkah a chhah țha viau mai bawk.

"A design tê reuh chu a mawi reuh kher mai," ka ti a, ani chuan," Hei nèn hian kha kha chu a design a inang chiah lo deuh a, ka tâ ve tùr a nia, hmeichhe bun tùr nèn chuan a inang thei chiah bîk lo a ni," a lo ti leh a, chutah,"Ka lo buntîr ang che aw, kan zin dùn a ni tih hriat reng nân pêk che ka duh ve hrim hrim a," a ti leh a. Inngaihzàwn vànga min buntîr tùr a ni lo bawk a, zungbun chu pein ka kut chu ka dawh zui ve nghâl mai bawk a.

Kan inbuntîr ve ve a, kan kut chu kan han pharh dùn a, en chîk deuh viau loh chuan a design chu inangah a ngaih theih hial ang chu,"I inhmeh khawp e," tiin a phone chuan thlâ a han la leh rih bawk a. Phone hi eng tik lai khân nge a lei ka hre chiah lo va, ka haw hnu si, kan zin dun hma deuh si khân a lo lei a ni ngei ang, Aizawlah a lei lo tih ka hre chiang a, he tah ni se leina hun a la awm lo bawk.

Hotel lama kan lêt leh hnuah chuan kan intleuh fai a, chumi hnuah zanriah tui tak ei tùrin kan chhuak leh a, ril a țâm lêm lo nain han ei tâkah chuan ka ei tam ve leh viau mai, an ei siam chu a tui ve êm a ni. Jakob-a bula ka sawi chuan," An siam tui bâkah a thianghlim a," a lo ti a, ani hi chu invawng ve tak a ni bawk a, a ei tam ve viau pawhin ka hre lo.

"Zanin chu lèn chhuah i duh em? Kan tei chhuak mai mai dâwn em ni ang?" tia min zawh chuan," Ka hre chuang hleinem, i tih dàn dán a ni mai," ka lo ti mai a, a rûk tak erawh chuan mut mai ka duh zâwk mah a, nimin leh vawiin lamah kein kan kal kual nasa si a, mut chawlh vang vang ka châk a ni.

"I rilru dik tak kha sawi ve mai țhìn la," min en vang vang hnu chuan a ti sup a," Kan lêng chhuak lo ang; mahse, i room-ah ka rawn lêng rih dâwn thung," a tih zawm zat a, kei chuan," Aw le, Boss. Ka va puar tak!" ka lo ti a, ka pum chu ka han chûl a, ani chuan," A làwmawm a nih chu; mahse, mi dangin mak an tih loh nân che an hmuh lai chuan i dul kha chûl lo la," a ti sup a, ka en hau phah nghe nghe, a nui deuh suk ka hmuh chuan min fiam a ni tih ka hria a; mahse, ka pum chu ka chûl zui ta bîk lo.

Room lam pan ta mai lo chuan kan hotel rooftop-ah kan chho a, boruak chu a vâwt si lo va, Mizoram lam a ngaihawm rum rum ka ti, in chungah chuan lo awm ve pawh an awm nual a; mahse, min lo ngaihsak hlawm lêm lo va, keini lahin kan ngaihsak bîk chuang lo.

"I lung a lêng em?" 

"Engah nge a lèn ngawt ang?" tia ka zawh lêt chuan a nui hawk a," Ka zawhna chu zawhna vêkin min chhâng lêt a," a ti sup phawt a, thaw hawkin," Hrehawm i tih loh hrâm ka beisei," a ti leh sup a, kei chuan," Ti nâng aw, nuam ka ti lutuk! Ka la kal ngai lohna hmun a nia, nuam ka ti," ka lo ti vat a.

"Hun remchâng hmasa berah ram dangah zin leh ila?"

"Khawiah chuan maw?" tiin ka en a, ani chuan," Khawiah nge i zin châk? S. Korea, Taiwan tih vêlah em ni? Nge Europe lamah zâwk?"a rawn ti leh a, a thil sawi chu a fiamthu a nih ka ring deuh ngawt a; mahse, a hmêlah chuan fiamthuna rêng a lang si lo.

"Nang, khawiah nge i zin châk?" tiin ka zâwt lêt thung a, ani chuan," Nang nèn a nih phawt chuan khawi lai hmun pawh nuam ka ti vek ang," a lo ti daih thung a, min chhànna chuan min tihamhaih deuh hlek a, ka ngawi ta rih a. A hnuah chuan," Thil dang daih, i thil min hrilh tùr kha min hrilh tawh la?" ka ti ta a, ani erawh chuan," A hmanhmawhthlâk loh, kan haw dâwn zànah ka hrilh ang che," a lo ti thung a, chutah," Engati nge i hriat châk êm êm a? I tân thil pawimawh tak a niin i ring nge Zodinsanga tân a pawimawhin i ring zâwk?" a rawn ti ta khauh mai a.

"A, thurûkte chu hriat a châkawm alawm, nang pawhin i hre ve châk tho ang chu," ka lo ti mai a, buai nuai lova ka chhâng thei chu ka lãwm kher mai, ani chuan," Ka tiam tawh che a, ka hrilh ngei ang che; mahse, kan haw dâwn zànah chauh, ka la sawi chhuah ngai hauh loh a nia," a ti ve leh a.

Zàna ka mu chu ka mu tui kher mai, mut pawh ka mu rei, ka harh chhan pawh phone riin min tihharh vàng a ni. Meng țha mang lo chung chuan ka lukham hnuaia phone chu zenin ka han en a, Jakob-a a ni tih ka hriat chuan phak zet hian ka han chhâng a.

"Tluangte..?!! I ni tiraw? Khawiah nge ka awm?!! I awm hnai ve em?"

Ka harh chiang nghâl kher mai. Ka țhu chhuak nghâl vat bawk a, he thil hi eng tikah nge a lo thlen ang tih ka lo ngaihtuah rauh rauh rêng a ni, Jakob-a a ni rei lutuk tawh tlat si a, Vâlpuia ni lova Zodina a rawn ni hlauh erawh ka lãwm tak zet a ni.

"I thawhna a rei tawh em? I room bul chiahah ka awm, ka han inphih fai ang a, ka rawn kal dâwn nia," ka ti sawk sawk a, hmanhmawh takin ka inphih fai a, ka mut thuamhnaw ka thlâk hnu chuan chhuakin Jakob-a room kawngkhàr chu ka han kik a, a rawn hawng ve thuai mai bawk a. Kan han inhmu chu min rawn kuah nghâl vat a, kawng chu a kea tlawh khãrin nghet zet hian min la kuah zui tlat a.

"Ka bula i awm chu ka lãwm e," a ti sap a, kei pawhin Zodina a ni tih ka hria a, ka kuah lêt ve tho. Rei tâwk tak kan inkuah hnu chuan," Engtin emaw tak a ti che em? Thil țha lo a ti lo ang chu maw?" tiin min han zâwt țan ta nghâl a, ka lu ka lo thing ringawt. Zodina a rawn ni chu ka hlim a, ka lãwm viau bawk; mahse, chutih rual chuan thil a kal dik lo palh ang tih hlauhthàwnna ka nei zui zat tho bawk.

A hnuah a khuma țhu chung chuan Zodina chuan engkim mai chu chîk zetin min zâwt dap vek a, kan hun hman dàn zawng zawng min zâwt dap a ni ber, kei pawhin hre thiamin thu dik tak vekin ka hrilh a, nui sakin room hrang kan nei chu a làwm thute a sawi luam a," Ka lo rin ang aiin a lo che fair ve phian a nih àwm hi," a ti ve hial rêng a, hlim takin a room-ah chuan kan awm dùn a, breakfast pawh a room-ah chuan kan ei dùn ta nghe nghe a.

Chawhma zawng chu room-ah kan awm dùn a, chawhnu lamah erawh kan chhuak ve a, kut inkai rialin kein kan kal a, ani tân pawh a kal vawi khatna a ni bawk a, kei chuan ka lo hre ve deuh hlek tawh zâwk bawk a, ka hruai kual a ni mai ang chu. Kan ril a țàmin ei tùr kan lei mai a, rilru engthâwl angreng tak chuan kan lêng kual a, ka phone-in thlâ kan la dùn nual bawk. A phone erawh chu Jakob-a phone a nih miau avàngin kan khawih duh lo va, min man chhuah leh kan hlau a ni.

"A thil hrilh tùr che chu a hrilh tawh che em?" a tih chuan lu thing nak pahin," Hrilh lo deuh, kan haw dâwn zànah min hrilh ang, chu chu min hrilh dàn a nia," ka lo ti vat a, ka sam min rawn huihsak pah chuan," A nih tak chu, thil pawimawh tak leh țangkai tak han ni hlauh se tiraw? Hêng lai thleng thlengin i kalpui a nia," a ti sap sap a. Rooftop-ah kan awm leh tawh a, light êng uar bâkah thlà a êng uar bawk si a, duh ber bula awm ka ni bawk nèn, nuam ka tiin tu dang mah ka ngai lo.

"Zungbun hi a pêk che a ni tiraw?" tiin ka zungbun chu a tuai a tuai a, kei chuan," Aw, kan zin dùn a ni tih hriat reng nân min pe a, a mawi reuh i ti em? Nang pawhin i bun ve tho a nia," ka han ti a, ani chuan," Duh lo teh mah ila, tûn atân chuan min rinhlelh loh nân ka bun rih mai a ngai a ni, min rinhlelh dun hlauh chuan i tawrh phah ang tih a hlauhawm si a, chu thil chu thleng tùrin ka duh hauh si lo," a ti leh sap sap a.

Rei tâwk tak Rooftop-ah chuan kan awm a, kan room-a chhuka mut mai chu kan huphurh ve ve a ni, a chhan chu naktûkin eng thil nge a rawn her chhuahpui leh dâwn kan hre si lo va, Vâlpuia emaw Jakob-a emaw a rawn ni leh thut thei si a, amah a nih lai hian ãm taka hun hman dun kan duh a ni; mahse, hunin tu mah a nghâk ngai si lo va, tu mah thlei bîk nei lovin hun inang, inzât țheuh min pe vek si a, inning lovin hun rei tak awm dun duh mah ila hunin ramrî a kham ve tlat si a. Kan chhuk dâwn chuan duhthawh takin kan infâwp leh vawng vawng a, inthlah chu harsa kan ti ve ve a ni.

"Ka ngaihtuah êm mai che, men tlang mai ka duh hial a ni," a ti chhuak hap nghe nghe a, kei chuan," Min ngaihtuah duh mah ta che, engtin mah min ti dâwn lo, a fair ve tâwk tih i hriat kha," ka lo ti thung a.

"Chu pawh chu ni se, a kiangah hun i hmang tih ka ngaihtuah ringawt pawh hian hrehawm ka ti asin, chu pawh hnam dang kârah lehnghâl, hmel hriat rêng rêng awm lohna hmunah," tiin rilru hah hmêl tak chuan a han thaw leh hak hak a, duh taka en chhoh pah hian," I rilru tihrehawm duh suh, ka tum ber ka tihlawhtling țêp tawh a nia, chu chu ngaihtuah tlat rawh," tiin ka han hnèm thung a, chutah," Eng nge ka hawn ang che? I duh duh sawi rawh," ka han ti zui a.

"Nangmah hi ka duh ber che, thil dang ka duh lo, him takin awm la ka bulah rawn lêt leh la ka duh ber," a tih leh chuan dingdihlîpin ka han fâwp a, lungchim taka kan infawh leh vawng vawng hnuah chuan room lam panin kan chhuk ve ta a, tlai pawh a lo tlai ve ruih tawh mai.

Jakob-a nèn chuan kan bazâr ve ngei a, thil țha leh man to tak tak min leisak a tum țhìn a, ka lo hnial ziah a," Engati nge min hnial tlat a? Leisak che ka duh alawm," a tih pawh chuan," Hei, min leisak tawh hi, a tâwk tawh," tiin ka kut chu ka han phar a, ka kuta zungbun chu ka hmuh a ni. Ani erawh chuan," Kha kha chu a dang daih alawm, Chennai zin ve mana eng mah lei haw loh chu a fuh nâng," a ti tlat a, ka hnial lui tlat duh ta bîk lo.

A tûk lawka kan haw tawh dâwn avàng chuan haw thei mai tùrin kan insiam sa vek a, zànah chuan lêng lovin rooftop lamah kan chho leh a, Chennai boruak ni hulh hulh chu kan tlànchhiatsan ve deuh thei hlek a, tlêm chuan a zia deuh.

"Ka awm loh chhûng khân Zodina nèn khân engtin nge in awm?"

Jakob-a chu ka en vat a, ani erawh chuan min lo en hauh lo, hla tak chu a thlîr tlat a, eng nge a ngaihtuah ang tih leh a thin a rim em tih pawh ka hre thei lo.

"Engtin mah kan awm lo," ka ti tãwi tak a, ani chuan," Zêp kher suh, ka room-ah pawh breakfast in ei dun kha, ka hriat chhuah loh i ring em ni?" a rawn ti chhuak leh ta nghut a, inherin min rawn en ta kur a, a hmui chu a chîp hmak mai bawk si a, a mitmengah lah chuan lungawi lohna, thinrimna leh min khawih mai duhna  hmu thei hialin ka inhria!

"A dik alawm, a zîng tho khân a awmna kha a hre thiam lo va, keimah ang thovin he laiah hian a la kal ngai lo ve bawk si a," tiin ka thiam tâwka dam leh a huat loh tùr nia ka rin dàn ber chuan ka han chhâng a, min chhâng lo chuan a hmui chu a la chîp hmak mai. 

"Ka sawi chu thu dik a ni," ka ti leh a, a ngawih rûna a thin a rim tawh hi chuan nuam ka ti vak bîk lo, a lang nèlawm loh nasa bawk si, a lang hlauhawm ka ti mai, khap hauh lovin min en kur bawk si a.

"In inkârah eng thil nge awm, dik takin min hrilh rawh, nang nèn hian ka room-ah breakfast kan ei dùn ve tawh em? Châk viau mah ila i zahawmna humhimsak che ka duh vàngin ka insûm hrãm hrâm asin," a ti ta nghut nghut a, thinrim tih hriat tak hian a vei tawn sek bawk a, a thin a rim tih ka hriat avàng chuan ka chhâng nam lawk bîk lo, thu dik hrilh lova dâwt ka hrilh chuan a hriat chhuah leh hunah...

"Sawi rawh, engati nge kan inkârah a rawn inrawlh? Ka țanpuina avàng chauha hetia nun pângngai nei hi a ni asin, ka țanpui a ni tih hi engati nge a hriat chhuah duh hauh loh? Amah țanpuitu hi theihnghilhin kan nunah a rawn inrawlh ang maw? Teuh lo mai! Ka rem ti hauh lo, ani lakah hian ka chân thei lo ang che, amah hi a ni lo em ni a nuhrawn hàl hlum tuma mei chhuahtu kha? A thurûk hi ka hre loah a ngai a ni ang e, he khawvël hriatah hian ka puang vek dâwna" a ti chhuak ta tùn tún a, a thu sawi chu râpthlâk leh mak ti zetin ka lo ngaithla a, amah ka hlauh pah avàng chuan ka khùr dar dar thei hial a ni.

"I hria maw? A pa nupui rinawm lo lai a hmuh avàngin thil râpthlâk tak a ti a ni, ka țanpuina avàng chauha tûn hun hi thleng thei a ni tih hrilh ang che, hetia ka chunga a chêt leh sî avàng hian kei pawhin a chungah hian eng pawh ka ti thei a ni tih hre rawh se. Zâwt ang che, a nuhrawn hâltu kha tu nge? A thurûk hi zêp bo hlen theih a inring chiah em?" a ti leh ta tùn tún a.

Jakob-a chu phâwk zetin ka en reng ringawt a. He thil hi maw Zodina thurûk chu lo ni a?!! A pa nupui(a nuhrawn) chu a lo hãl a maw?!! Chuvangin, a pate bulah pawh awm lovin a pu bulah a rawn awm ta daih a...A, a ni thei ngei ang, ani pawhin a nuhrawn rinawm lo lai a hmu tih min hrilh ngei tawh kha. A rinawm lo lai a hmuh avàngin, a thinrim thin thawkin a nuhrawn chu a hãl ta a ni ngei ang, a va rãpthlâk êm! A pu thil min hrilhte kha ka ngaihtuah chhuak nghâl uai uai mai.

*RIM TAKA HNA THAWKIN EI HMU PAWH NI ILA, CHAPOPUI KHER LO ILA, MI DANG SAWISÈL PHAH NÂN PAWH HMANG KHER LO BAWK ILA*